因為一篇非周星馳本人撰寫，但又係網絡廣傳嘅文章《為什麼這麼多人黑周星馳？》，結果卻引起電影人向華強妻子陳嵐，力數周星馳五大罪狀。仲限周星馳十日之內現身解釋，今日已經去到第八日，但周星馳除咗昨日有去為新片選角之外，都未有作出回任何相關回應，究竟所謂何事？
其實講真，呢樣就係所謂以靜制動，以不變應萬變的藝術。事關一篇文章，雖然內裡講得多、而且不少內容都有事實根據，但終歸非周星馳本人撰寫。但卻因此引來其他人強烈反應，甚至對其作出更多指控。假如以現今社會風氣，唔係開個記者會又數臭對方，就係不斷係網上留言反擊。
不過周星馳就選擇一個最聰明，亦係香港人本來應該有嘅態度：不作回應。事關撰文者非佢本人、既非出自佢口又如何能夠作實？而且依家正係新戲選角及籌備之時，又何來會有時間同呢種八掛新聞糾纏落去？所以周星馳一直不作回應，其實就係一種最好方法。
其一，整件事情其實只係單純由一篇網絡文章而起，向太陳嵐回應，再由網民及傳媒去將事情炒熱。假如有任何回應（不論公開或私下），最終都會成為助燃劑將事情繼續昇溫（尤其是靠呢類新聞搵食嘅娛樂記者們）。所以要將整件事降溫、甚至解決，最好方法就係自己不作回應，減少其他人加把嘴將事情昇溫嘅機會。到最後可能得陳嵐自己一個人繼續講，不過網民注意力會隨時間及新事情而轉移，到時事情自然就會有更好解決方法。
其二，亦係最簡單一件事：唔係佢做，佢又何需心煩管太多？倒不如將精力投放係工作之上。反正為啖氣出聲，都唔會有啖飽飯佢食。反而專心做好電影工作，票房好，就有錢搵。
P.S 行筆之時，又見到大陸傳媒引述「圈中人消息」，講到周星馳又有憂鬱症、又話已經私下搵人向陳嵐道歉。不過大陸加娛樂新聞、重係圈中人消息，我估大家都係花時間睇下政改、罷課、或者點樣係星期六朝早搶iPhone 6好過。
