尋日介紹過五個全球最奇特島嶼，得意又有、恐佈又有，係咪覺得唔夠喉呢？今日筆者就會介紹埋最後五個奇島，等你見識一下世界原來幾多古靈精怪地方，唔係只得個香港島同南丫島。

6.世外桃園 詛咒之地：太平洋 巴美拉環礁 Palmyra Atoll

尋日介紹過其中兩個靈異島嶼，講真雖然都話恐佈，但好多時都係啲人口耳相傳，最後先變成一個所謂恐佈地方。不過今次介紹呢個位於太平洋，與世隔絕嘅巴美拉環礁，就真正咁發生過一次殺人事件！

話說早於1798年，最初登島嘅海員，已經係島上見到唔少靈異事件，例如忽然出現係身邊嘅珊瑚、奇怪光球等等，而且每一個登島海員，都表示整個島都有種令人毛骨聳然，但又搵唔出原因嘅感覺。

而係1974年，中年的Graham夫婦駕駛帆船海風號（The Sea Wind）到島上旅行，但海風號之後，卻由一對陌生男女Duane Walker及Stephanie Stearns駛回夏威夷。而Graham夫婦則消失於世人眼前，即到1981年，妻子遺體被登岸嘅船員發現被埋藏係一個鐵箱之中，先揭發出一宗謀殺案。

不過最奇怪，就係不論動機、另一人屍體所在、以及當日發生過咩事，全部都隨著兇手Duane Walker之死，以及Stephanie Stearns沉默，而成為島上另一個不解之謎。


7.億萬蟹群大遊行：澳洲 聖誕島 Christmas Island

大自然真奇妙，成億隻蟹過馬路你見過未？

係澳洲聖誕島，一到雨季大家就會見到呢個奇景。因為島上最蟹群，每年都會係雨季濕度較高期間，離開佢地居住嘅樹林地帶，湧到五里外嘅海中交配。（至於點解唔係樹林度交配？蟹呢樣野我地識條鐵咩）

而呢個時候，大家可以想像下，行行下旺角，忽然有成億隻蟹係你面前橫過彌敦道。呢個就係聖誕島每年都會見到嘅情境，不過聖誕島上居民不單止覺得無問題，而且重「包容」班蟹咁做。

緊係喇，班蟹唔會大聲亂叫、唔會打尖、唔會搶佢資源，邊個會趕佢？


8.山中有島中有島：菲律賓 塔阿爾火山 火神島

今次呢個島，無可愛動物、無靈異事件、更加無靚女。但係佢個地理環境就十分奇特：佢係一個湖入面嘅一個火山口入面個湖裡面嘅一個小島（特登唔加標點符號，大家試下跟著讀）。

話說塔阿爾火山本身，位於呂宋島 八打雁省嘅塔阿爾湖之中，而經過多年爆發之後，火山口又變成一個湖。但另一次火山爆發，卻又再令火山湖裡面多出一個小島。

講真，呢個島雖然無乜特別野，但係淨係睇佢呢個山中湖、湖中島嘅特色，已經夠晒值得。

9.美國神秘組職 島上暗藏基地：美國 紐約 迪爾島

對於一像暗謀論者來講，美國骷髏會（Sukll and Bone）應該唔會陌生，不過今次要講嘅唔係佢地點樣操控美國社會（而且重有幾多人記得，其實佢地係一個大學組織加同學會），而係佢地一個所謂秘密基地，位於美國紐約嘅迪爾島（deer island）。

其實迪爾島點解會係奇島之一，其實係同環繞著骷髏會，以及由於佢係屬於私人物業有關。簡單來講，就係無人知班人係上面做乜！再加上骷髏會眾多神秘傳聞，自然就會有好多都市傳說，例如新會員入會儀式係上面進行、會員會係上面密謀征服世界等等。

不過想深一層，個島其實似係一班精英阿叔得閒無野做，成班同學夾份買個私竇玩下多。

10.貓の天國： 日本 宮城縣 田代島

何為天國？就係有貓，而且有好多唔怕人嘅貓！

而日本田代島，宮城縣附近嘅田代島，就係一個貓奴天國！因為係3.14平方公里面積入面，島民就只有70人，但貓卻有超過100隻。

話說係江戸時代（1603至1868年），田代島原本係以絲綢生產業為主，不過島上卻係個時出現鼠患，而商人就係個時將貓引入到島上，自此老鼠就係島上絕跡。而後來絲綢業退出田代島，但貓卻未隨之而離開，反而成為島上漁民守護神一樣，甚至連供奉貓嘅神社都有。

當然，近年多得互聯網發達，田代島「貓島」之名，亦都被外國遊客所知曉，成為全球又一個奇特島嶼。