平常搭經濟客艙因為空間太小，所以基本禮儀上乘客都一定要互相遷就，咁先至唔會惹起紛爭，令自己或者其他人全程機都受苦。但其實當乘客們喺顧住自己舒唔舒服嘅時候，好多麻煩野都會不其然咁轉嫁左比空中服務員。而最近各位空姐同空少，就總結左21樣佢地非常討厭嘅乘客行為，唔知你地又有冇曾經唔小心做過呢？
1. 唔打招呼
「Welcome Aboard!」係空姐空少都經常會同大家打嘅招呼，雖然係一定會做嘅工作，但佢地其實都好想大家會回應一下佢地，同佢地say番個hi。
2. 叫野錯Timing
（圖片來源：Odyssey）
明明啱啱起飛佢地已經忙到踢晒腳，要開始準備成機人餐飲，但你偏偏要快人一步理想達到，率先要求要飲呢樣，要攞個樣。仲有人地明明推住車派餐，你就無端端要人幫你掉垃圾，等一陣先啦人地唔係剩係服侍你一個！
3. 唔用心睇／聽安全指示
起飛之後，空姐空少都一定會有安全指示教學，等大家知道有緊急狀況時應該點應對。你唔睇本身已經對自身安全有威脅，但唔該唔好搞到其他人都睇／聽得唔清楚，因為出事嘅時候嗰幾秒就已經係非常關鍵！
4. 將腳撐向前座／牆上
（圖片來源：shaunscrackedcompass）
咁做除左有機會惹起紛爭，更係好唔衛生，所以拜託你唔好咁做，真係好無禮貌...
5. 問：「你有乜野野食／野飲。」
其實一般航空公司離離去去都係嗰幾味，仲有飛機上係有餐牌，可以自己閱讀，唔需要空姐空少介紹番飛機上有邊100種酒，等你慢慢諗完先去服侍其他已經諗好嘅搭客。
6. 拎唔到自己想食嘅野就大吵大鬧
飛機唔係五星級餐廳，沽清就真係無得比你食，你點鬧個餐都唔會變番出嚟。一係食，一係唔食，呢兩個選項你自己慢慢揀。
7. 問你食咩仲戴住Headphone
派餐其實係人都見到，但空姐空少過到嚟你仲係超無禮貌咁戴住Headphone唔理人。
8. 叫咖啡唔講清楚
要咖啡無講清楚要唔要落奶或者糖，其實一叫嗰刻講清楚就可以慳番大家好多時間，下次你叫咖啡知道自己應該點做啦？
9. 叫空姐空少時少啪手指
平常呢個動作就已經係超級無禮貌，所以更何況對住空姐空少做？
10. Hand Carry 細細袋都放上行李架
（圖片來源：passengershaming）
個袋咁細就放喺椅底啦！咁細舊就阻住左其他人放，搞到空姐空少要從機頭行到機尾，搵番個空位比真正有需要嘅乘客！
11. 拎件重到自己都拎唔到嘅行李
（圖片來源：passengershaming）
撐到上飛機就以為空姐空少會幫到你抬上行李架？有冇自私少少呀你？你都抬唔到，將心比己人地點同你抬呀？
12. 小小事就撳服務燈
啱啱起飛嗰陣其實係好忙嘅時段，所以拜託唔好小小事就走嚟撳服務燈。另外如果已經響起就坐，扣上安全帶嘅燈號，基於安全理由都唔係撳服務燈嘅好時機。
13. 喺「Pantry」做瑜珈
(圖片來源：Facebook)
飛機廚房位置其實係空姐空少做野嘅地方，雖然知道大家坐得好辛苦，但唔好無端端走嚟佢地做野嘅地方做瑜珈，因為真係好阻住做野。
14. 就嚟降落仲霸住廁所
咁其實係會造成航班延誤，真係多謝晒你。
15. 同空中服務員有太多身體接觸
空姐空少同緊另一個乘客講野，無端端有人就用手督佢或者拍佢條腰，其實都會好尷尬同有機會惹起不必要誤會，所以做好都係出聲問對方較好。
16. 安全帶燈已經亮起仲去廁所
（圖片來源：rd）
除非你係一個兩、三歲嘅小朋友、老人家，或者係有需要人士，如果唔係其實個幾分鐘都可以忍一忍，等安全帶燈熄左先去都未遲，因為真係有氣流嘅話，情況真係會好危險。
17. 唔著鞋去廁所
（圖片來源：passengershaming）
坐飛機除鞋無錯係舒服好多，但去廁所就唔該唔好唔著鞋去，你抹晒人地啲排泄、分泌物番自己個位喇... 多謝...
18. 問空姐空少有冇筆
外遊要有筆旁身係基本動作吧？其實飛機上面唔會有咁多支筆借比你...
19. 以為可以偷偷走過去升級
唔好以為偷偷地行過去就可以自動升級。傻的嗎？你估人地真係發現唔到？
20. 小小事就怪責空姐空少
（圖片來源：onedio）
突發事情無人會預計到，所以如果出現左意料之外嘅事情，仲要本身唔關空姐空少事嘅話，怪責佢地就真係講都講唔通，你鬧佢佢都未必可以幫你處理到問題。
21. 覺得空姐空姐同機師有心靈感應
空姐空少其實只係知道大約5%左右機師做嘅工作，所以就算你問佢地當地天氣會係點、航道有冇改變，或者會唔會早左land，佢地都唔會知。
