好多姊妹都會因為自己年紀越嚟越大，會開始為自己尋找另一半嘅事變得非常心急，好想儘快將自己嫁左出去。但其實喺著急嘅同時，你其實知唔知道有7類嘅男人係令人情願單身都好過，而唔應該為左脫離獨身同佢地喺埋一齊嘅呢？
1. 工作狂型
喺現今商業社會裡面，相信好多人都會因為工作而不斷消耗自己生命。而假如你同左一個工作狂喺埋一齊，咁你就需要有心理準備對方會將工作排喺先過你嘅位置，令你地結婚之後無正常家庭生活之餘，更無人分擔家庭大小事，需要獨自承受經營家庭嘅壓力。
2. 專業證書型
無錯佢係一位專業人士，有晒律師、醫生專業證書，但實際情況當中你同佢喺埋一齊，似係你同佢張證書拍拖，而同佢個人根本就無任何火花。如果你最終真係同佢有情人終成眷屬，婚後生活應該都會悶死自己。
3. 將就喺埋一齊型
因為好耐都搵唔到適合自己嘅另一半，有啲女仔就會索性降低自己要求，搵一個同自己無咁合襯嘅對象，諗住自己到時嫁左出去就算。但其實講真嗰句，或者佢真係唔配做你戀人喎... 諗清楚先好呀！
4. 反叛大細路型
同呢類人拍拖可能係非常好玩，經常都會有驚喜，每次見到佢感覺到好新鮮，但對於一段長遠嘅關係嚟講，佢卻係令人擔憂嘅類型，會搞到你經常都擔心佢喺外面搞搞震，唔係偷食就可能係犯左事咁。所以如果有一刻諗佢同佢結婚的話，你真係要諗清楚佢係唔係真係一個可以長久承擔起成頭家責任嘅人，先至好作決定呀...
5. Sales型
有機會從事服務性行業嘅佢，無論做緊乜野都好，佢都係chok住咁講野，次次都用sales tone同你講野咁。初時或者你唔多覺，但聽得多真係難分真與假，更會有機會比佢口甜舌滑而呃到你嘅感情！
6. 無自信型
可能因為你可憐佢，於是你就會同佢做朋友，之後見佢份人其實都無乜野，相處都OK就同佢喺埋一齊。但其實雖然佢份人無乜野，但欠缺自信多數都無無法改變，因此絕大部分時間佢都會令你都沈淪喺負面氣氛當中，無法進步反而比佢拉低。
7. 吸血鬼型
經常都會陪伴自己左右，但一講到錢銀嗰一個moment，佢就會側側膊叫你比左先，之後又從來唔會主動話比番你？咁你試諗下同佢長久喺埋一齊嘅時候，租金、電費等佢都會奉旨覺得係你應該比嘅情況係幾令人憤怒，簡直就好似比人佔盡便宜咁呀！
圖片來源：Tumblr
封面圖片：favim
