11月11號係光棍節！獨（毒）身嘅你今日有冇安排咩活動比自己，定抑或會選擇繼續獨（毒）留在家中呢？！話時話講到判斷一個人「毒」定「唔毒」，你有冇試過測試下自己係屬於咩Level呢？如果你能夠一個人獨自做到Lv. 10嘅指定動作，而且係表現的流暢自如，咁就代表你真係毒到核爆喇！
▼ Lv. 1：自己一個去濕平
其實都無咩野丫，自己一個去買仲可以按自己喜好睇野唔駛就身邊朋友添..
▼ Lv 2：自己一個食麥記
自己一個食麥記其實都無乜野丫？快快脆就有餐到，之後又可以快快脆食完走，問題唔係好大丫？？
▼ Lv. 3：自己一個去Starbucks打躉...
一個人坐響度你眼望我眼咁，好似有啲尷尬... 但講真好多文青都係咁，所以毒等級屬於初心階段啦...
▼ Lv. 4：自己一個去睇戲
好多人都會習慣同朋友去睇戲，同人講鐘意自己一個睇多數都會令人好驚訝。但其實去戲院睇戲都唔可以同身邊人討論劇情架啦... 而且黑媽媽咁人地鬼知你係唔係一個人睇咩...
▼ Lv. 5：自己一個去食糖水
食糖水多數都係同人食完飯搵地方hea多陣先會去.. 自己一支公咁去真係好鬼礙眼，感覺完全同甜蜜相反....
▼ Lv. 6：自己一個去唱K
「從不～～～～喜歡孤單一個～～～～」下面嗰句就係「可惜偏偏孤獨一個」，一個人去唱K真係好勇先得，或者唱K神器就解決左唔少人呢個煩惱，所以先會大賣啦？！
▼ Lv. 7：自己一個食放題
放題越多人食，食到最多種類嘅野嘅機會就越高。一個人去食？除左食唔得多之外，真係超級孤獨。就好似自己去參加大食比賽咁，不過係要比錢嘅...
▼ Lv. 8：自己一個去海洋公園
過山車？自己一個坐... 睇水族館？自己一個睇... 玩跳樓機？自己一個叫... 啊... 太古怪喇.................. 完全無得同人一齊分享喜樂嘅感覺！！！
▼ Lv. 9：自己一個人搬屋
搬屋有咁多野需要執頭執尾，得自己一個無任何人幫手真係超厲害先做到... 但自己一個搬屋，相信唔少留學生都試過.. 其實... 又有咩好怕喎～
▼ Lv. 10：自己一個人去醫院做手術
身邊無其他人支持同同你入去之前打打氣，真係會幾驚... 而且做完手術出嚟又無人探.. 睇落真係好似好慘咁！
唔知你地lv去到幾多呢？唔會係lv 1-10都做晒掛？？？
