秋天已經來臨!天氣乾爽又涼快,當然就係登高行山嘅最佳季節啦!但講到行山,好多人或者就會因為慣左都市人嘅生活而擔心自己應付唔嚟,而錯過左香港郊區秀麗嘅自然風景。

為左令大家喺今個秋季能夠享受得到行山嘅樂趣,今天小編就將會為大家帶嚟8條初心者專屬嘅行山徑。只要大家事前做足準備,就可以同三五知己一齊執起背包Let's Go!

1. 金山家樂徑

綜合難度:★✩✩✩
全長:1 公里(起點:金山路;終點:金山路)
預計需時:半小時

如果大家想一家大細行山以及燒烤,位於金山郊野公園,而且交通非常方便嘅金山家樂徑就非常適合帶同小朋友體驗行山樂。短短1公里嘅路程,大家就可以喺旅程中漫步暫時遠離市區繁囂,同時欣賞九龍水塘集水區次生林觀景,接觸山上動物如猴子。

2. 菠蘿壩自然教育徑

綜合難度:★✩✩✩
全長:0.8 公里(起點:菠蘿壩;終點:菠蘿壩 )
預計需時:1小時

位處於城門郊野公園裡面,菠蘿壩自然教育徑係屬於初級難度嘅行山徑,全長約800米,預計步行1小時就能完成。沿住菠蘿壩自然教育徑行走,中途就可以跟隨當中14個導賞點了解城門水塘、引水道及附近植物嘅有趣歷史,秋天更有機會觀賞到紅色楓葉。

3. 北潭涌自然教育徑

綜合難度:★✩✩✩
全長:1 公里(起點:大網仔路復興橋;終點:上窰民俗文物館)
預計需時:1小時

想喺行山嘅同時睇歷史文物,北潭涌自然教育徑就可以一次過滿足你兩個願望,讓你喺穿梭香港優美嘅自然景觀之後,參觀民俗文物館作為完美嘅句號。沿住北潭涌大網仔路前進跨越復興橋,大家就能夠從北潭涌自然教育徑起點沿著河畔認識鹹淡水交界處嘅獨特地理及生物。穿越林地及竹林之後,旅程終點就將會係獲列為法定古蹟嘅上窰民俗文物館,大家亦都可以依照開放時間入內參觀。

4. 黃石家樂徑

綜合難度:★✩✩✩
全長:2 公里(起點:黃石碼頭巴士總站;終點:黃石碼頭巴士總站 )
預計需時:1小時

黃石家樂徑靠近海邊,只要喺西貢黃石碼頭巴士總站落車就已經能夠輕易到達。除左一般行山徑都能夠欣賞到嘅叢林景觀之外,黃石家樂徑更可以遠眺東心淇山及高塘口等海岸景致,飽覽大灘海峽、塔門、高流灣及灣仔半島。此外,黃石家樂徑嘅土瓜坪海灣更有著一大片紅樹林,必定能夠讓你認識香港海岸嘅生態。

5. 鷹巢山自然教育徑

綜合難度:★✩✩✩
全長:3 公里(起點:大埔公路;終點:大埔公路)
預計需時:1.5 小時

鷹巢山自然教育徑之所以有著個咁霸氣嘅名,全因鷹巢山就真係麻鷹黑鳶嘅棲息地,並且有著壯麗嘅湖光山色。鷹巢山自然教育徑分別有著13個觀賞點,除左會介紹徑內植物及景色之外,更會解釋當中所含有嘅生物化學現象,認識由植物學家胡秀英博士所命名嘅秀英竹等其他多種植物,以及飽覽東九龍一帶景致。

6. 昂坪奇趣徑

綜合難度:★✩✩✩
全長:2.5 公里(起點:天壇大佛;終點:天壇大佛)
預計需時:45 分鐘

昂坪奇趣徑位處於香港第二高峰鳳凰山附近,而且起點及終點更加係天壇大佛,可謂係一條甚有靈性嘅行山路徑。當從寶蓮寺旁邊嘅林蔭小路進入昂坪奇趣徑,大家沿途就能夠見到寶林寺、羅漢寺等著名古寺,同時認識昂坪高原上常見嘅本地植物群。此外喺旅程末段,大家更可以感受到「曲徑茶香」,親身接觸獲稱為「雲霧茶」嘅昂坪特產。如果有足夠能力、行山經驗以及裝備,大家更可以喺遊歷奇趣徑後轉戰登上鳳凰山。

7. 紅梅谷自然教育徑

綜合難度:★✩✩✩
全長:1.3 公里(起點:紅梅谷;終點:引水道 )
預計需時:1 小時

位處於獅子山郊野公園內,紅梅谷自然教育徑沿途有15個觀賞點,解說當中植物、地質地貌等生物及化學現象。雖然紅梅谷自然教育徑靠近市區邊緣,但喺茂密嘅叢林之間大家卻能夠置身於大自然嘅世界之中,細聽蟲鳴鳥語,呼吸清新空氣放鬆心情。更甚嘅係喺紅梅谷自然教育徑最後一站,大家更可以近距離接觸沙田著名地標「望夫石」。

8. 分流郊遊徑

綜合難度:★★✩✩
全長:2 公里(起點:鳳凰徑第七段 落分流東灣:終點:分流村)
預計需時:1 小時

分流郊遊徑除左現今自然景觀之外,喺短短兩公里嘅旅程當中,更有著豐富嘅歷史古蹟,能夠帶大家重返香港數百年前嘅古代。該處之所以或成為「分流」,只要原因係因為嗰度橫截左大嶼海峽西北濁黃及東南蔚藍兩股水流,形成一條彎曲的分界線。更重要嘅係喺分流郊遊徑當中,大家更可以見到香港西南端嘅白色燈塔,認識到燈塔所肩負嘅導航使命。

資料來源:政府郊野樂行網頁

圖片來源:Instagram, 政府郊野樂行網頁