無論公司規模大抑或小，辦公室政治基本上都係隨處可見，凡係有人嘅地方都必定會發生。如果能夠避得就避，當然就最好不過，但如果工作上係要同同事有所接觸，而佢地又成日好似同你對著幹，當你係乜都唔識嘅話，當然就絕對唔好受。
咁究竟點先至代表佢地認為你係超級愚蠢呢？如果你喺工作嘅時候發生以下12個情境，咁就或者意味左佢地真係當你好蠢好好蝦。
1. 冷嘲熱諷
相處嘅時候如果對方經常都只係一句起，兩句止，而且更加句句都帶有嘲諷嘅意味，咁就代表佢地唔太重視你嘅意見，更加有機會係低估你嘅能力。
2. 身體語言無禮
翻白眼、冷笑、恥笑、鄙視等等，呢啲一睇就知道係唔友善嘅身體語言，並且意味你嘅同時譏諷緊你。
3. 恥笑你
當你明明唔係講緊笑，而且仲要係好認真咁講緊自己意見嘅時候，你身邊嘅同事竟然無端端笑起上嚟。咁嘅狀況或者就代表左你喺同事堆當中，其實一直都係被認定為一個笑柄，無人重視過你，甚至有想侮辱你嘅想法。
4. 無視你
一旦被同事認定為愚蠢的話，基本上佢地就會認為所有嘅野都無需向你過問，亦都唔需要同你有任何交流。所以當辦公室裡有人無視你嘅時候，或者就代表左佢唔覺得需要將你放在眼內。
5. 經常發生口角
假如你嘅同事經常都對你吹毛求疵，又成日為左啲好小嘅事而同你有爭拗，咁呢個就一定唔係個好嘅徵兆，代表左佢地為求證明自己好醒而需要將你踩低。
6. 為你嘅成功感到意外
當你成功完美地完成某個工作項目，你所獲得嘅並唔係同事讚賞，而係被人投以奇異目光，甚至係敵視嘅眼神，咁或者就代表左你嘅同事從來都低估你嘅能力，覺得你根本無可能完成到你成功達成嘅任務。
7. 從來唔會叫你幫手
就算佢遇上乜野問題，需要搵人幫手都好，佢都一定唔會走嚟求你伸出援手。同樣地就算你主動提出幫忙嘅建議，佢地都會為之拒絕，全因佢地覺得你相當無能無野幫到手。
8. 拒絕伸出援手
喺工作上遇上任何問題，你身邊嘅同事同樣都係無動於衷，無諗過要幫你手。當然要判斷佢地係唔係真係當你好蠢而唔想幫你，首先就要睇下佢地係唔係手上真係有野忙緊而唔得閒幫你先啦！如果佢地真係兩手空空，無野做緊都唔幫你，或者佢地真係對你無乜善意。
9. 自嘲
如果你開始採取自嘲，貶低自己想得到其他同事認同，咁你就已經輸左而且仲真係會令你變得越嚟越蠢，只係識得迎合佢地意見。除此以外，自己貶低自己更加會令人容易佔你便宜，並且將你推向谷底。
10. 自視過高
除左自嘲之外，另一個會令其他同事不滿嘅就將有機會係你自視過高，經常自吹自擂。假如你真係有呢個習慣而且仲要係吹水唔抹咀的話，咁就有可能令其他同事覺得你非常愚蠢，唔喜歡同你有任何交流。
11. 怕自己出醜
好多時候因為怕自己出醜，唔少人遇上疑難都會唔敢提問。但其實根據Time報導，懂得喺適當時候發問，而且好學嘅人其實更為有能幹。
12. 成日講粗口
更甚嘅係如果你因為工作壓力而經常喺工作場所爆粗，咁可能就會影響左同事對你嘅觀感，覺得你身為成年人都唔識得分場合講應該講嘅說話。
