何佩瑜鐘意做屋邨師奶仔

何佩瑜 (Jeana) 從來出演的角色都係靚靚女女，但她在後日(5日)港台播出的《人間有情》之單元《蘋果的故事》中，卻飾演一名與兒子相依為命、性格孤僻的單親媽咪Apple，其角色由頭殘到尾，冇得扮靚之餘，仲要畫深黑眼圈，頭髮蓬鬆，不過Jeana不知幾鍾意，直情大讚是她入行以來的最靚角色。

Jeana笑說：「如果撇除鬼妝同死人妝，呢次係我印象中好深刻造型，因為我好鍾意個劇本，好想劇組化到我愈醜愈好，加晒黑眼圈，膚色就印尼姐姐咁，但我望住塊鏡見到個造型，係令我好易入戲，我好開心接到呢套戲，呢個角色係我有史以嚟最鍾意同最美嘅角色，我所謂嘅美，係指可以俾我喺戲中發揮得淋漓盡致嘅美。」

劇中的Jeana是個極之草根的屋邨單親媽咪，每日湊仔、落街買餸、在茶餐廳打工洗碗，對旁人施以援手感到抗拒，其後更衍生另一個故事。其實Jeana在拍攝時正值炎夏，所以每次去後巷、街市拍戲都熱到抽筋，不過她拍得開心，尤其喜歡飾演其囝囝的小演員趙啟嵐，Jeana稱：「呢個小朋友好聰明，同佢拍戲一啲都唔困難，好好玩，佢記性仲好過我。最好笑係啟南第二日同我拍戲時，係衝埋嚟攬住我，嗌我Jeana媽咪，嗰一刻我就明白如果自己仔女咁樣衝埋嚟嗌自己係會好冧架。同埋今次成個拍攝團隊好落力，雖然係港台劇，但拍出嚟嘅效果係同電影冇分別。」