假如要係地球搵啲奇怪地方，就一定要介紹下啲奇怪島嶼，因為多得佢地理特殊：唔係與世隔絕有種神秘感、就係當然當年發生過天災人禍，做成依家各種奇怪生態。而今次一連兩日，筆者就為你介紹全球十個奇怪島嶼，等大家知道除咗香港島（尤其是政府總部）多騎呢事之外，世上重有好多古怪地方值得大家去睇！
1.歷任島主 無一倖免的詛咒之島：意大利 Isola La Gaiola
假如有人同你講有一個島，歷任島主都會遭遇各種不幸的話，咁佢一定講緊意大利 拿波利附近嘅Isola La Gaiola。由1920年開始，第一任瑞士藉島主Hans Braun及太太雙雙被殺後，每一任島主都會不幸降臨身上：心臟病發身亡、被送入精神病院然後自殺、破產、親人被綁架、而最近一任島主Gianpasquale Grappone、則因為保險詐騙於2009年入獄。
而之此自後，個島就一直被傳有詛咒而丟空到依家。不過出奇地，詛咒只會應驗係島主身上。單純貪玩上去探險、或者係一般泳客咁多年來都係安然無恙。如果唔係死得咁多人，筆者都想去住過世。因為佢由兩個小島所組成，四面環海。再加上接近市區，不論環境同方便性都一流。
2.二戰毒氣工場 化身兔子天堂：日本 大久野島
二次世界大戰，日本一直有生產化學武器已經唔係秘密。不過無人會估到，一個化學武器工場，最後會變成一個兔子天堂！
係日本廣鳥附近，瀨戶內海裡面就有個大久野島，就係當年其中一個化學武器工場。不過到依家，已經成為300多隻兔仔家園！不過點解會有咁多兔？日本人自就有兩個講法：話說係二次大戰，為左測試化學武器效率，日軍係島上養咗一群兔仔做白老鼠。而戰爭過後，大久野島工廠被廢棄。而原本島上兔子就因溫暖而每天敵情況下，一直繁殖到依家。
而另一個則是官方講法，就係大久野島之後改建成度假聖地，而當年發展商就引入四對兔子，再係保育之下成為島上特色。不過大家睇埋下面條片，就知裡面真係有幾好玩！
3.沉船之墓 野馬之家：加拿大 Sable島
係加拿大哈利法克斯（Halifax）海岸附近，有一個被稱為大西洋之墓嘅地帶，就係筆者要介紹嘅Sable島。當年由於航海科技仲係以木船為主，所以一個唔小心出意外，Sable島就係附近唯一可以靠岸等待救援嘅地方。
不過當年就係因為一艘沉船，令一群野馬係無天敵，但又有足夠糧食情況下，繁殖到依家成為有400匹野馬嘅族群。而且因為島上並無商業價值，只有科學家去做考察、以及小數人定居係上面。加上無任何並不能吸引到大陸自遊行去參觀，所以島上生態一直保持得唔錯…
4.陰魂不散 附身娃娃：墨西哥 La Isla de las Muñecas
之前提過意大利嘅Isola La Gaiola，可能大家都話「挑，有咁啱得咁橋之嘛」。不過來到墨西哥城，霍奇米爾科附近，一個名位La Isla de las Muñecas小島上。雖然咁耐以來只成過兩個人，但當你見到島上一堆公仔殘肢，以後背後個故事，你就會發覺呢個地方認真邪門。
話算係1950年代，一個叫Don Julian Santana嘅人，一夜之間忽然決定拋妻棄子，走到去島上不斷掛上被遺棄嘅公仔。一說佢當年親眼睇著一個細路女，浸死係島附近河中，而佢咁做，就係用來幫個細路女靈魂擋著外來邪靈。
不過另一個講法，就係佢想去救人不成，結果細路女呼救聲一直係佢腦中徘徊著，而公仔就係畀個細路女靈魂可以不斷附身，唔會走去搞佢。就係咁，一掛就掛咗50年。
不過故事最終都係2001年，以Don Julian浸死係同一條河、同一個地點告終。
5.毒蛇帝國 生人止步：巴西 Ilha de Queimada Grande
不過之前講果四個島，一係就動物天堂、一係就令人毛骨悚然嘅恐佈。不過來到巴西嘅Ilha de Queimada Grande，你就可以一次過有體驗到兩種感受？（才不要！）
Ilha de Queimada Grande，中譯就係「蛇島」，位於巴西聖保羅市海岸，一個43公頃大海島（約2 1/4個維園大）。不過就係呢個島上，就住滿咗2000到5000條金矛頭腹蛇，其毒性更係一般毒蛇五倍，足以使人體肌肉壞死。所以巴西海軍一直嚴禁任何非相關人仕進入島內，唔係你死咗都唔知咩事。
