中秋節日有咁多好野食，就咁月餅都已經有分成4、5種，如果再連埋其他中秋應節食品，例如各種當造水果、芋頭仔等一齊食嘅話，咁就真係好容易食到自己飽飽滯滯，辛苦自己。
想要喺中秋節嘅時候趁機食一年先得一次嘅應節食物，但又想避免出現飽滯嘅感覺？或者您就應該喺今晚賞月之前準備好用以下呢幾種中式或西式嘅消滯方法，咁就唔怕谷住個肚瞓都瞓唔好啦！
中式消滯法
1. 酸梅湯
坊間雖然有好多即買即飲嘅酸梅湯，但其實佢地大多數都加入左好多糖去煮，所以無效之餘更加會傷及脾胃。要有效使用酸梅湯消滯，記得要少糖、少甜，咁先至可以依靠烏梅的酸性增加胃酸分泌，同時促進腸臟蠕動，幫助消化。此外，當中嘅山楂亦都可以減低油膩感覺。
2. 濃茶
發酵過嘅茶葉含有較高嘅咖啡因，因此就能夠刺激胃酸分泌，有助加快食物於胃內消化，除去消化道入面嘅脂肪。但濃茶其實亦未必適合每一個人飲用，因為從中醫嘅角度嚟講，青茶同白茶等都係未經全發酵嘅茶類，性質寒涼多飲反而會傷及脾胃。
3. 洛神花山楂茶
洛神花係一種近期興起嘅花茶，而原來連同山楂一齊沖泡，就能夠有效消滯，全因洛神花及山楂都係活血化瘀，消脂同時清積滯嘅食材。只要用熱水將洛神花同山楂沖泡15至20分鐘，之後加入蜜糖就可以。
西式消滯法
1. 進食高纖食物
從西醫嘅角度嚟講，高纖食物係可以促進腸道蠕動，加快食物消化嘅過程。所以如果感覺飽滯嘅話，可以食以醋調味嘅沙律，或者食高纖嘅水果例如菠蘿木瓜等。
2. 做運動
感覺飽滯的話其實都可以做一啲唔太劇烈嘅運動，例如散步、健身操等促進腸部蠕動，消化食物。
3. 進食含益生菌食物
益生菌係有效加速消化同排便嘅食材，所以喺飽滯嘅時候食乳酪就能夠有效減低肚谷谷嘅感覺。
4. 多飲水
水其實係最簡單，而且能夠加速身體各種代謝嘅飲料。此外，清水同時更可以軟化消化道入面食物嘅殘渣，有助毒素儘快排出。
