辦公室戀情係好多人拍拖嘅禁忌，主要原因係因為雙方當喺埋一齊嘅時候，大部分時間都會幾影響工作，而且更加會係好容易為難左同事。但雖然係咁單喺美國當地，原來就有38%嘅雇員表示曾經喺工作場所裡面搵到自己嘅另一半，咁究竟係唔係意味左辦公室戀情並唔係唔可行，而且更加係可以一試嘅呢？或者你喺開始之前就應該從以下10點考慮一下。
1. 公司係唔係允許辦公室戀情
公司唔允許辦公室戀情？乜宜家唔係自由戀愛嘅世代咩？真係唔一定架。喺部分較為嚴厲嘅公司裡面，員工守則就真係會寫明唔可以發展辦公室戀情。為免同公司政策互相抵觸而招致紀律處分，大家都係check清楚員工守則先好開始一段戀情呀！
2. 你希望喺呢段關係中得到啲乜
愛能夠讓人沖昏頭腦，亦因此你更需要退後一步睇清楚自己想喺呢段關係中得到啲乜，避免戀情影響自己仕途。例如你對呢段戀情係唔係真係好有信心，覺得自己會同對象白頭到老呢？而且當假設自己被對方拋棄之後，你又能唔能夠繼續公允咁執行公務呢？呢一切一切你其實都需要仔細考慮。
3. 你嘅對象係唔係你老細？
如果你覺得對方真係值得你努力追求，而且佢又係你上司嘅話，或者你就應該考慮辭去目前工作先同佢喺埋一齊。主要原因係就算你地兩個喺工作上表現得公平公正，但對於其他員工嚟講睇法卻往往相反，亦因為呢個原因，你或者就會喺大家嘅閒言閒語間感受到壓力，有機會令關係結束或者同其他同事結惡。
4. 對方係唔係單身
如果無睇清楚對方係唔係單身就追埋去，謠言就一定會依法不可收拾，而且更加會影響埋你同對象喺工作上比人嘅印象，覺得你地在公在私都屬於非常不道德，令你地雙方喺職場上不被尊重。
5. 你擅唔擅長化解僵局？
無論你同另一本幾夾都好，其實都一定會發生爭執。而當大家陷入左爭執嘅僵局，你又識唔識得點樣化解，令工作處事上唔會受到你地之間嘅私事影響呢？如果唔能夠喺短期內解決問題，對於工作上真係有非常大嘅影響架！
6. 小心墮入性騷擾局面
有啲人對於對象一口拒絕，接受能力真係會好低，更會令佢地變為非常激進，處處針對該位同事。另外如果你太過進取，將自己同對象嘅距離拉得太近，對方亦或會覺得你太過親近，而誤會成你騷擾緊佢。所以喺進取追求對方嘅時候千萬要睇清楚對方係唔係感覺唔舒服，千祈唔會勉強為難左對方。
7. 戀情有機會影響事業
戀情雖然係私人事，但喺職場上卻係有機會影響上司判斷你夠唔夠資格晉升，從你同同事之間嘅關係考慮應唔應該對你委以重任。假如你喺認為戀愛大過天，有晒心理準備覺得有咁嘅決定都無問題嘅話，或者你就可以試下發展辦公室戀情。
8. 辦公室戀情帶來嘅正面影響
講左咁多缺點係唔係就代表乜野優點都無？其實又未必嘅。因為辦公室戀情某程度上係可以為你帶來工作原動力，令你喺工作上變得較為積極、正面，同時提升工作效率。
9. 睇下佢係唔係同你好似
根據外國嘅一向研究，唔少辦公室戀情所擁有嘅共同點，就係雙方無論喺性格、處事方式、學歷等各方面上，其實都非常相似，令你覺得自己多左個同路人，可以同對方發展落去。
10. 怕唔怕比人喺背後指指點點
喺辦公室發展戀情，就算無影響到人都會好容易招來話柄，惹來唔少人嘅閒言嘅語。而喺背後飽受別人攻擊嘅時候，你同伴侶又有無能耐克服呢個難關呢？所以真係除左你地兩個之外，其實仲有好多野要顧慮架...…
