一開始，大家都以為唔關香港事，點知台灣強冠地溝油，原來已經暗中入侵香港，仲有近400間食肆、大至酒店名廚、小至地踎小館，都係香港食物安全中心名單之中！
尋日食物安全中心，正式公佈香港有近400間食肆，曾經從台灣強冠產品分銷商，購入疑似受影響地溝油產品高達500噸，但只有當中一成產品成功回收封存。而名單之上除一般小型食店外，仲有連鎖食店如王家沙、尖沙咀凱悅酒店、跑馬地AMIGO、西環森美餐廳、紅磡煌府酒樓、旺角康年餐廳亦榜上有名。
不過今次份名單，似乎有機會殺錯良民。例如旺角嘅好旺角麵家，就聲稱多年來都係同香港一個供應商買燒豬油、又或者自己製做炸豬油，從未使用強冠產品；而另一方面，香港大型連鎖餐飲集團美心，則表示自9月5日起已經停用強冠出產嘅「全統香豬油」、並從9月8日起轉用荷蘭入口產品。
所以當你以為係香港好安全？結果無聲無色之中，地溝油已經殺到埋身！
