香港講真你想食乜基本上都可以輕易搵到，但喺乜野都唾手可得嘅狀況之下，你地又有冇意識到有啲食物其實正喺我地嘅地球入面逐漸消失緊，而且更加會有滅絕危機嘅呢？

唔想自己喺失去嘅時候先至識得珍惜？咁就快啲認清以下7種食物即將消失嘅原因，好好愛惜環境，以免情況再度惡化落去！

1. 牛油果

要種植出一磅嘅牛油果就需要用到72加侖嘅水，亦即係等同於要種出兩個中等大小嘅牛油果，就要用咁多嘅水。覺得咁樣嘅解釋唔夠具體？換個角度講，其實72加侖嘅水就等同於沖4次涼嘅耗水量。所以種植牛油果係需要使用比一般農作物多嘅水。

更甚嘅係世界上80%嘅牛油果原來都係產自美國加州，呢個經常處於乾旱狀態嘅沙漠裡面，因此牛油果嘅價錢一直都並不便宜，而且產量更越嚟越少。

2. 鷹嘴豆

同牛油果差唔多情況，要出產一盎司嘅鷹嘴豆，所需嘅用水就要達到76加侖。所以要製作出一罐15盎司嘅鷹嘴豆，所用嘅水就會達到1,140加侖，可想而知係幾咁晒水呢！

亦有因為受到全球暖化所帶來嘅旱災影響，鷹嘴豆嘅產量就已經下降左40%至50%，所以真係非常有可能喺大家有生之年當中消失於大家嘅食桌之上。

3. 咖啡

根據CBC新聞數據，全球70%嘅咖啡或者會喺2080年前完全滅絕，令大家無法再次品嘗自己最愛嘅一種咖啡豆，回憶起嗰種特別齒頰留香嘅味道。

由於世界大部分嘅咖啡豆係以阿拉比卡豆製作為主，而且呢種咖啡豆嘅最佳培植溫度係華氏64至70度，因此假如溫度過高，咖啡豆嘅成熟速度就會加快，影響最終咖啡嘅味道。所以假如溫度繼續受到全球暖化所影響，咖啡質量就會首當其衝。

4. 鮮魚

假如我地食魚嘅速度保持不變，研究就指出大海將會喺2048年就會無晒鮮魚，造成供應及生態危機。之所以會造成咁嘅局面，最主要原因係因為拖網會摧毀海床之餘，更加會一次過誤捉瀕危魚類，影響物種多樣性，同時破壞生態平衡。當海洋物種天然嘅調節系統失衡之後，海洋就會更加容易受到污染影響，引致惡性循環嘅局面。

5. 花生

仲諗住可以食住花生等睇戲？有專家表示花生有機會會喺2030年完全消失，而原因亦都係歸咎於全球變暖呢個令天氣反常嘅現象。由於花生喺生長嘅時候，需要持續溫暖氣候，以及穩定嘅20至40吋雨水，因此假如氣候太過乾旱，花生就會無法生長。相反如果雨水過多，花生亦都會因此發霉，令佢無法成功種植，就算種左出嚟都唔食得。

6. 楓糖漿

對於喜愛吃甜點嘅朋友嚟講，楓糖漿簡直係好似必要食糧一樣，絕對唔能夠缺少。但其實要有充足嘅楓糖漿產出，楓糖樹就必須要喺穩定而且特定嘅氣候中成長。由於地球目前受到嚴峻嘅氣候變化影響，因此楓糖漿出產嘅季節亦都逐年推前。更甚嘅係由於乾旱且溫暖嘅氣候並不適合楓糖出產，太過寒冷又會令楓糖凝固，以致楓糖無法產出。

7. 朱古力

同鮮魚一樣，人類消耗朱古力嘅速度遠比出產嘅快。單係喺去年，全球就已經消耗左超過70,000公噸嘅可可豆，而專家更加指出去到2020年，人類消耗可可豆嘅數字更加會達到每年百萬公噸，甚至係2百萬公噸。除此以外由於主要嘅可可生產地西非，氣溫亦都係趨年上升，因此可可豆嘅生產速度亦受此影響而下降。另外，目前可可豆亦正被一種霉菌入侵，造成大片可可田失收嘅狀況。