感情好離好合，因了解而分開或者會令您快感覺好少少，可以快啲復原。但如果好似呢為來自英國嘅29歲女仔咁，竟然喺13年裡面，7次戀情7次都係另一半偷食收場，或者您就會懷疑自己究竟係唔係「賤男攝石」，究竟自己係唔係做錯左乜野先會令到佢地咁樣對待自己。

對於女生喺咁嘅情況下分手收場，英國女華森坦言自己非常明白，而且更以過來人身分詳細喺自己嘅Youtube頻道上解釋大家慘遭拋棄後一般所有嘅反應，以及令自己迅速療傷應做嘅10件事。

咁相比起借酒消愁同喺Facebook度跟蹤前度，有啲咩係會令你更快脫離傷痛呢？

1. 斷絕所有來往

雖然知道你可能覺得好唔抵，好想搵番佢出黎箍煲又或者繼續發洩，但華森坦言你嘅前度根本就已經係「賤男」，所以你其實係唔應該再同佢講野浪費自己時間。

2. 唔好灌醉自己

好多人會喺失戀之後借酒消愁，但其實咁樣做只不過會令你情緒轉趨不穩定，更會令你做出愚蠢行為，例如打電話比嗰位偷食嘅前度同佢地嘅朋友，又或者走去佢地Facebook上面跟蹤佢地狀態。

3. Unfriend Unfollow佢

就算佢有幾賤格都好，有啲人都喺同佢地剛剛分手之後，喺夜闌人靜瞓唔著嘅時候搵佢地個社教網頁嚟睇。其實咁樣暗地裡跟蹤佢地嘅動態係極不健康，只會一直令您記掛住呢個唔值得掛住嘅人。

4. Whatsapp都Block左佢

除左Facebook、Instagram、Twitter之外， Whatsapp都應該block埋佢，提防自己心癢癢睇住佢最後上線時間同想搵番佢傾計。所以都係同一句，同佢斷絕所有來往啦！

5. 唔好怪責自己

對方同自己喺埋一齊嘅時候，好地地點會走去偷食呢？一定係自己做錯左喇！其實咁樣諗絕對係錯嘅觀念，因為無論你做咩都好，佢地都一定會選擇暗地裡偷食，瞞騙你嘅感情。佢唔鐘意你嘅話大可以抽身離去，而並唔係搵個藉口黎選擇出軌傷害你。

6. 唔好收埋自己

因為感情失敗覺得非常心灰，選擇收埋自己唔出去進行社交活動，認識新朋友？自己對住自己間房四幅牆，又點會再次令自己開心呢？同朋友出去散散心啦！

7. 千祈唔好食回頭草

唔少人都應該知道同呢啲人分手之後，佢地都會莫名其妙咁番番轉頭想同你修補關係。但講真佢做得一次就意味左會有下一次，你地兩個之間根本就再無互信關係，就連做朋友都全無可能。

8. 出去玩

同前度分開左，所有時間都係屬於自己架喇！而且你仲要係已經係回復單身喇添！仲唔快啲安排時間，出去玩下放鬆心情，又或者搵番個識得珍惜自己嘅人？！

9. 唔好當自己係受害者

去到下一段關係仲繼續強調自己係受害者其實並無幫助，因為錯嘅係偷食個一位，繼續糾纏喺以往嗰段感情係無補於事。

10. 愛自己

比人拋棄係好可惜，但如果你自己都唔識得愛惜自己，只係識得自暴自棄嘅話反而會累左自己。就算世界上面幾多人唔識得珍惜你，你都應該要愛惜自己，好好照顧自己。

全片：