夏天已經嚟到喇喎！你仲未減到冬天積落嚟嘅byebye肉？著唔到泳衣需要遮遮掩掩？咁或者係因為你用錯左減肥方法先會減極唔瘦。唔想成個夏天都無得著小背心、短褲、短裙？咁你就應該留意下自己係咪有以下7個壞習慣，即刻改善或者仲嚟得切嘅！
1. 做完運動之後食太多
好多研究都顯示要有效塑身，運動就係最直接嘅方法。雖然運動係可以燃燒體內能量，達至消脂修身效果，但由於喺運動完之後食慾就會因而增加，因此就會令唔少人喺運動之後不自覺進食更多食物，攝入番比之前更多嘅卡路里。
2. 身體本身已經有預設體重
當減到某個磅數嘅時候停滯不前，減唔到落去，其實有機會係因為受到你身體嘅潛意識影響，已經為你訂下左一個預設體重。外國一項研究指出當老鼠節食令體重下降之後，佢地習慣會食番多啲嘅食物，令自己回復番之前嘅體重。同樣地如果強行向老鼠餵食，就算佢地體重因此增加，之後佢地都會調節番自己嘅飲食令自己體重回復正常，顯示動物自己心中其實係有預設嘅理想體重。
因此當人開始節食減肥嘅時候，身體就自然會因為意識到體重有著變化而產生飢餓感覺，令你想補充番失去嘅能量。所以要成功減肥，相比起單靠量度自己卡路里嘅攝取量，同時考慮進食較為飽肚嘅食物可能會更加有效。
3. 早餐組合唔正確
卡路里攝取量並非設計早餐餐單嘅最主要元素，更重要嘅其實係要睇埋進食之後嘅效果，例如會唔會影響你進食下一餐嘅食慾等。喺外國嘅一份研究裡面，3批學童獲分配進食分別即食燕麥（1,400卡路里）、條狀燕麥片（900卡路里）及水果奄列（750卡路里）嘅早餐，結果發現進食水果奄列嘅學童竟然喺下午食得更多。因此就算食物含有類似嘅卡路里，之後對於食慾嘅影響都係會完全唔一樣。
4. 採用低卡減肥法
好多減肥方法都會主張攝取較低嘅卡路里，但現實中咁嘅減肥方法其實係全無效果。當人覺得肚餓嘅時候，集中力就會去左搵野食，想儘快解決飢餓嘅感覺，同時令人感覺非常虛弱。因此如果靠攝取低卡路里減肥，就會令人墮入惡性循環，不斷想追求解決飢餓感。
5. 代糖其實係最大敵人
雖然代糖並無任何卡路里，但當中嘅人造糖精卻係會更為刺激味蕾，令人覺得天然水果、蔬菜嘅甜味較淡，減低進食嘅慾望。同一時間人造糖精其實亦都會增加人嘅飢餓感覺，令人攝取更多能量，無助減肥。
6. 對零食嘅渴求
零食如薯片、曲奇等所含有嘅加工碳水化合物，雖然能夠瞬間消除你心中魔鬼，但其實卻會令你落入萬劫不復嘅陷阱，令你上癮。所以如果你忘記左戒除含有加工碳水化合物嘅食物，就好大機會難以有效塑身。
7. 錯用食鹽
食鹽無錯係可以令食物更加美味，但其實進食太多含鈉嘅食物係相當無營養，因為正常嘅建議攝取量，人均就只係3至6克。而假如吸取太多嘅納，亦都會提高患上心血管疾病嘅機會。
