唔少人對於坐飛機其實都唔會有太大嘅好感，因為講真個句又有邊個人想幾個鐘頭屈響飛機嘅有限空間度坐定定，又無得好似喺地面咁隨意做自己想做嘅私人野呢？所以無論係坐短途定抑或長途，大家一上機個一刻其實就會諗住好想快啲落機。
如果你覺得宜家坐飛機已經好辛苦嘅話，咁你或者應該要慶幸自己唔係50年代嘅旅客喇！因為原來睇番當年嘅客機服務同價錢，真係完全係貼錢買難受！睇完以下呢5點，你或者從今日起就會識得對現代航空業服務改觀添呀！
1. 貴到爆炸
50年代屬於航空業嘅黃金時代，但亦因為客機呢種代步嘅工具剛剛開始盛行，所以價錢自然唔會平得去邊。舉例喺當年要喺美國坐內陸機，由芝加哥飛去鳳凰城就當年就需要比1,070港幣，雖然聽起黎好似都唔係太過分，但其實計埋通漲實際價錢就係宜家嘅9,061港幣，簡直係比宜家相同旅程嘅機票貴40%呀！
2. 危險好多
根據統計，飛機事故喺50年代發生嘅機率比現今高5倍，喺100,000個飛行時數裡面，就會平均有5.2人因此喪命，比宜家嘅1.33人高。起因除左係因為飛行儀器比宜家落後，令到降落墜毀，甚至係空中相撞嘅意外都會發生。更嚴重啲，就連飛機引擎都有機會喺航行中途脫落，所以你都唔好話唔驚呀！
好喇，就算比你架飛機好穩陣，飛師技術好好無撞到，但當遇上氣流嘅時候，你架飛機就會因為技術所限，好似坐過山車咁急墮500尺，再加上當年飛機嘅樓底咁低同埋安全帶設計較差，脊椎就自然好容易受傷。
此外，由於飛機設施亦都無考慮過類似嘅意外發生，遇上氣流就還容易撞落尖角，意外足以致命。
3. 悶到發癲
我地宜家搭飛機就有電影、劇集睇，又有歌聽，但想當年佢地只係可以你眼望我眼，食下飲下睇下窗外白雲。而由於當年搭飛機係會有postcard送，唔少人為左打法時間，佢地就會索性寫下postcard消磨時間。
4. 又煙又酒
如果你唔係一個煙民當年走去搭飛機，你嘅經歷就必定會相當痛苦，因為你將會喺咁多個鐘頭都坐喺毒氣室裡面，無法躲避。由於當年無任何禁煙或者使用明火的規例，唔少人因為無乜野做就自然不斷煲煙同飲酒。
5. 超級種族歧視
喺50年代嘅時候由於美國仍然實施種族隔離政策，因此飛機幾乎只白人專屬嘅一種交通工具，絕少情況會有其他種族乘搭。除左係因為有色人種嘅人工較白人低之外，另一個原因係航空公司都對白人以外嘅搭客都非常抗拒，唔會比佢地同白人一齊搭同一架飛機。更甚嘅係有部分航空公司更會要求接線生識得辨別非裔人士嘅聲線，防止將佢地同白人安排喺同一班航班之內。
講左咁多缺點，咁究竟50年代嘅飛行旅程係唔係真係一文不值？當然未必啦！例如當年過海關比宜家寬鬆得多，座位亦都寬敞、舒適得多。此外，由於當年搭飛機係有錢人嘅活動，空中服務員同旅客嘅比例都會較為平衡，能夠做到隨傳隨到嘅服務。
