旅行對於貓奴嚟講，除左係個了解當地文化，以及同當地人交流嘅好機會以外，更重要嘅當然就係要探訪嗰度嘅貓星人，任佢地差遣一下先得啦！而假如你真係咁鐘意貓貓嘅話，咁以下呢10家遍佈世界各地嘅民宿你就一定要Bookmark定喇！點解？因為佢地間間入面都有貓貓囉！
1. 韓國首爾
韓國潮流勢不可擋，亦因為呢個原因唔少人都會選擇喺短假期裡面前往當地旅遊，趁機了解當地文化。距離東大門鐵路站只係5分鐘路程，呢間富有韓國歷史特色嘅傳統大屋可能會適合你，除左兩至可愛嘅貓貓會同屋主一樣好客接待之外，喜歡閱讀嘅或者更加會被屋內嘅書藏吸引到！
2. 日本小津
喜歡貓咪嘅話諗起景點，獲稱為日本貓島的青島就自然係唔少人夢寐以求想去嘅地點，一試獲大批貓咪包圍嘅感覺。而假如你正在計畫前往青島嘅話，呢間距離JR喜多灘站只有10分鐘路程，而且非常靠近貓島嘅小屋就一定適合你。
3. 泰國曼谷
雖然距離地鐵站路程頗遠，繁忙時間更有可能坐成個鐘巴士先去到間民宿，但呢間位處於泰國曼谷小區嘅小屋卻深得唔少住客歡迎，全因屋主同埋家中兩隻貓貓都非常親切，而且更加係設施齊全，仲可以使用會所嘅健身室、泳池，或者係瑜珈室等。
4. 越南胡志明市
對比起其他民宿，呢間位處於胡志明市市中心附近嘅小屋入面竟然就有4位貓星人住客，而且根據入住過嘅網友評語，入面嘅4隻貓咪都係非常痴人，一見到你就會熱情迎接，非常好客！相信假如係貓奴入住嘅話，必定會好想將自己嘅時間奉獻晒比佢地，會唔捨得出門口！
5. 星加坡
有貓固然是能夠入選喺呢個名單裡面出現，但假如除了有貓星人之外，更加有汪星人呢？對於喜愛動物嘅朋友嚟講，應該真係會加唔少分！更甚嘅係呢三位嘅毛孩原來更加係屋主領養番嚟嘅呢！
6. 冰島雷克雅未克
冰島嘅呢間民宿歷史悠久，而且更係位處於雷克雅未克內一間建於1907年嘅木屋之內。假如你係喜歡貓貓嘅話，入住呢間屋就能夠等你同兩個可愛的「屋主」互相交流，出租apartment嘅貓奴Una更加表示屋入面嘅貓星人係非常樂意以摸摸作為報酬呢！
7. 英國倫敦
位處於倫敦Zone 1嘅呢間英式小屋對於旅遊嚟講交通都算係方便，靠近倫敦唔少景點例如帝國戰爭博物館、國家歌劇院等等。屋主Sue更加表示唔少時間喺花園嘅時候，更加會聽到大笨鐘報時嘅鐘聲。喺小小嘅英式小屋裡面，貓咪Kooky亦都係其中一位常駐住客，曾經入住過嘅旅客都表示Kooky係非常友善，而且非常可愛嘅呢！
8. 荷蘭上愛塞省
久居喺石屎森林裡面，有時候真係會好想去一啲近郊地方放鬆一下。假如你正在計畫前往荷蘭體驗一下近郊生活嘅話，呢間充滿荷蘭風格嘅悠閒小屋就一定會適合你。同樣地除左兩隻白雪雪嘅貓星人之外，小屋更加有一位汪星人熱情接待住客架！
9. 阿姆斯特丹
略嫌一般住宅感覺普通？或者呢間位處於阿姆斯特丹嘅船屋就能夠滿足到你！打開船屋嘅後門，你就可以隨心躍進河入面暢泳，而且屋子距離阿姆斯特丹市中心更加就只係15分鐘路程！去完景點遊歷過後番到民宿，屋入面嘅貓貓更加係會耐心咁正準備治癒你疲累嘅心情。
10. 美國布魯克林
距離著名景點布魯克林大橋只係5分鐘路程，呢間屋裡面就有著一隻只有三隻腳嘅貓星人等待你愛鍚。而且喺民宿附近，更加係開設左唔少嘅特色酒吧、Cafe，以及餐廳，等你可以喺遊覽當地後同朋友chill下、傾下計。
