勇於挑戰自己,並不是年輕人的專利,90歲的婆婆也不一定只會安在家中收看電視,或到公園晨運、乘涼;一名居住在澳門90歲的嫲嫲早前便拍住孫女馬曼莉(Kylamary),首次拍攝寫真集,衣著更相當前衛。

1989年出生的Kylamary大有來頭,事關她不但是獲獎無數的歌手,也是時裝精品店的店主;故此,這次拍攝的服裝、飾物、化妝、造型,均由她親手一一安排,包括:

All black系列:連身裙、帽子、圍巾、鞋子、墨鏡也是黑色,配上有型有款的動作。

 

休閒Look:「You raise me up」字樣T-恤、工人褲、黑色帽子、金色項鍊,予人溫馨感覺。

 

貴婦造型:白色恤衫、紅色開叉長裙、黑色圍巾、墨鏡。

 

雖然嫲嫲穿上跟平日大不同的服飾,擺出各式各樣的姿勢,但絕無怯場;而每當有人讚嘆婆孫二人長得很相似時,嫲嫲總會笑到「見牙唔見眼」。

除了替換不同的造型外,兩人亦要前往不同的地點取景,令Kylamary擔心嫲嫲的體力未必應付得了,但對方卻越影越起勁,又笑指孫女沒有捱過,才會覺得累壞。

這句說話令Kylamary憶起跟嫲嫲的難忘往事:「佢從來都唔容許我哋食淨任何東西,當然宜家都係咁;佢又會講,自己以前嘅生活好困苦,想食都未必有得食;佢為咗氹我食嘢,每次都會講一句『最後一啖,美人照鏡』。雖然呢啲說話同回憶好簡單,但就非常之甜蜜,令我一生難忘。」

Kylamary又記得:「我細個果陣時,成日發惡夢,而每次驚醒之後,嫲嫲都會喺身邊安慰我,令我嘅心即刻安定落嚟。佢又會喺每個星期日,帶我去白鴿巢公園打羽毛球;雖然呢啲只係一啲微不足道嘅小事,但就係我彌足珍貴嘅美好回憶。」

Kylamary的難忘往事充滿歡笑聲,相比之下,嫲嫲分享的往事則驚險萬分;嫲嫲憶述:「最深刻嘅係,我有一次同馬曼莉失散咗,雖然最後喺警察局搵返佢,但我果時已經嚇到眼淚都飆晒出嚟,怕佢俾壞人拐走咗。」

Kylamary和嫲嫲已經充滿甜蜜和快樂的回憶,相信值得珍重的事情會繼續載入她們的心中,事關她們是一對滿載愛與感恩的婆孫。

***片段主題曲是Kylamary的新歌Re:volution

資料來源:Kylamary、Kel Li Art Gallery