氣候變化問題近日愈來愈嚴重，全球各國都需聯手抵抗同防止極端天氣惡化落去，否則，地球上某啲城市好可能會因此面臨危機。近日聯合國教科文組織（Unesco）就公布咗名單，上面列出地球上10個奇景，有機會因為氣候變化而消失。

1. 非洲，布温迪國家公園（Bwindi Impenetrable National Park）

喺非洲烏干達布温迪逹國家公園（Bwindi Impenetrable National Park）入面，住咗全球過半既瀕危絕種動物山地大猩猩，而呢個國家公園亦係少數可以俾遊客直接觀看呢啲罕有動物既自然生活習慣。但係，全球暖化令可以俾呢啲猩猩生存既森林活動範圍減少。

2. 格陵蘭，伊盧利薩特冰川（Ilulissat Icefjord）

喺全球氣温上升既威脅之下，南北兩極要面對冰川融化既情況愈來愈嚴重，而格陵蘭伊盧利薩特冰川（Ilulissat Icefjord）亦係其中受影響力之一，氣温持續高企，令當地既冰川融化得更快，亦意味住冰川覆蓋範圍會愈來愈細，長遠更會令海平面上升。

3. 英國，巨石陣（Stonehenge）

被譽為全球最奇怪同神秘既建築，位於英國既巨石陣（Stonehenge），隨住英國、歐洲等地既氣候變得愈來愈暖，令出現颱風、水浸既次數愈趨頻密，咁就有機會破壞呢啲戶外建築。

4. 尼泊爾，薩加瑪塔國家公園（Sagarmatha National Park）

尼泊爾既薩加瑪塔國家公園（Sagarmatha National Park），就係位於世界最高，有8,848米既珠穆朗瑪峰上面。呢個國家公園仲保留咗當地少數民族既耕作方法，而全球三分一人依靠由喜瑪拉雅山流落嚟既水作平日之用。但係，隨住全球暖化問題，以及降雨既不平均，呢度既水資源開始出現供不應求既現象。

5. 菲律賓，水稻梯田（Rice terraces of the Philippine Cordilleras）

梯田係農民耕種同灌溉既其中一種方法，而喺菲律賓科迪勒拉山既水稻梯田（Rice terraces of the Philippine Cordilleras）至今已經有2000年歷史。呢個水稻梯田風景優美，成功吸引來自世界各地既遊客，而家亦面臨氣候變化帶來既各種負面影響。

6. 美國，梅薩維德國家公園（Mesa Verde National Park）

位於美國科羅拉多州既梅薩維德國家公園（Mesa Verde National Park），入面有超過4500個考古學遺跡，當中包括呢個國家公園既崖邊住屋；但呢啲奇特既自然景象，現時正面對大火同水浸帶來既侵蝕，逐步破壞呢啲珍貴考古遺跡。

7. 智利，拉帕努伊國家公園（Rapa Nui National Park）

智利既拉帕努伊國家公園（Rapa Nui National Park），亦即係復活島（Easter Island），最令人熟悉既當然係島上既摩艾石像，早喺大約公元1250-1500已經出現。但係，現時呢個島既太平洋東南部就正面對水源不足既情況，咁係源於當地夏天雨水不足，海平面上升同海岸線被侵蝕。

8. 德國、丹麥、荷蘭，瓦登海（Wadden Sea）

流經三個國家，包括德國、丹麥和荷蘭既瓦登海（Wadden Sea），係至今全球最大亦保存得最完整既潮泥灘，除咗係全世界最出名既地址，仲係好適合候島遷徙棲息既地方。但隨住海平面上升，令生物既生存條件同習慣都大大改變。

9. 意大利，威尼斯（Venice）

海平面上升，一啲沿海城市甚至海上城市就肯定岌岌可危，好似意大利威尼斯（Venice），而作為世界知名既旅遊熱點，旅客人數上升一方面加重咗基建既需求，另一方面亦為當地帶來唔少收入。但係，呢啲地方既正面發展，都正受到海平面上升同颱風呢啲大自然因素所威脅。

10.厄瓜多爾，加拉巴哥群島（Galápagos Islands）

提到厄瓜多爾既加拉巴哥群島（Galápagos Islands），一定會諗起達爾文（Charles Darwin），自從佢喺1835年到訪呢個島之後，發現多種棲息喺呢個島上面既罕有生物。但到咗今日，當哋既生態系統就正面對海平面上升，海洋氣温上升同埋降雨呢啲自然現象既威脅。