結婚係一生大事，更有機會成為你人生中最開心精彩既時刻。但係，當你準備展開呢個人生既新一頁之際，有幾樣野必定要同你另一半搞清楚先，因為結咗婚之後就，有好多生活習慣、想法都要兩個人重新磨合。以下呢6個問題，就係一啲婚後好實際要面對既情況，記得決定行禮交換戒指之前就要好好諗清楚。
1. 同另一半屋企人關係好唔好
兩個人結婚背後牽涉既永遠唔止兩個人，而係兩個家庭既事，所以基本上由你哋互相認識時，就要好好維繫同對方屋企人既關係；事關萬一真係決定咗結婚之後，兩個家庭會變得密切，就算唔係一齊住，都最好唔好有啲咩大爭拗，免得偶然見到面時都搞到尷尷尬尬。
2. 控制慾既問題
關於控制慾既問題，其實唔單止係準新人，就連普通情侶都一定會面對。但係，如果你同你既伴侶已經去到談婚論嫁既地步，控制慾呢樣野就要更加小心處理喇，事關兩個人都由本來自己一個人，變成兩個人生活。有時有啲生活上既細節，或者你認為無傷大雅既生活習慣，對方未必鐘意甚至覺得反感，繼而就會想對方跟住自己一套嚟行，控制同改變對方既諗法同習慣，長久落去好容易發生爭拗。
3. 真係已經吷定咗脫離單身？！
就算你哋兩個即將變成一對夫婦，都應該保持返自己既獨立性同自主性，呢個問題對於喺婚前已經試過同居既情侶就唔難解決；但係對於一啲一直以嚟都習慣自己一個人住或者閃婚既單身人士，就記住要做好心理準備脫離單身，第日要預留更多時間陪你既另一半。
4. 遇上爭拗時，大家既處理方法唔同
兩個人相處好多時都會遇到意見不合既地方，甚至有機會嗌交，但係以前你哋可能分開住，就算嗌咗交都有時間、空間冷靜吓；但如果結咗婚之後，大小事都幾乎要攞個共識。所以，如果你哋本身都係個堅持己見，會硬碰硬既人，可能就要諗得實際啲，如果第日遇到爭拗時，應該邊個作出讓步。
5. 要唔要小朋友最好先要有共識
有人結婚主要係為咗生兒育女，所以，雙方喺結婚之前都一定要先傾好大家第日結婚之後，會唔會想有小朋友。喺呢個問題上面，只得生或者唔生，但如果你哋真係到結咗婚，先去拗呢個問題時，就變得太遲架喇。
6. 同另一半既睇法完全相反
正所謂人係獨立個體，就算再夾都好難將對方變成另一個自己，所以，我哋極其量只可以喺彼此既價值觀同對事件既睇法上面，攞到接近啲既意見。呢啲價值觀講緊既係你哋對世界上發生既事有共同或者相似既睇法，其次係大家會朝住同一個目標進發，咁就可以同步經營一樣野，仲有擁有一樣既道德標準。
