奧巴馬越南宵夜隊啤圖（黃一恒）

奧巴馬在越南小店食宵夜歎啤酒吹水的照片在網上瘋傳，並被一眾香港網友質疑照片的真確性。疑點包括：

點解小店周圍沒有水馬？
餐館內其他食客，一定係CIA假扮！
唔驚啲食物有毒咩，一定係奧巴馬自己帶去。

自從中國國家主席習近平訪問英國，以及人大委員長張德江訪問香港之後，香港人開竅了，個個熟懂中國國情。領導人外訪出巡喎，梗係要有大排場，各種大小的水馬是少不了的。山頂都尚且要派警察駐守防止有人掛Banner表達意見，又點可以有平民咁容易走近領導人身旁呢？唔怕人舉牌示威嗎？所以要麼清場，要麼派特務人員喬裝市民就好了。至於食物，還是帶自家食物去吃好，以防有人落毒。

但至於中國一套國情，能否套入美國人那裡呢？我真的不懂。但我知道美國著名飲食電視節目主持Anthony Bourdain，就深明中國人要跟領導人合照而抬高身價的道理。我手上得到兩張奧巴馬在越南小店吹水照片，都是出自Anthony的Facebook和Instagram，照片中的主角除了美國總統奧巴馬外，另一主角就是Anthony本人。但見Anthony跟奧巴馬二人係越南小店撐住檯腳吹水，其他食客同樣在周圍用膳卻無礙他們二人的閑情，可見Anthony跟奧巴馬的親密私人關係。此圖一出，Anthony豈不是一登龍門，升價十倍？

當然，此圖之出現，受惠的不單獨是Anthony，而奧巴馬亦贏盡掌聲。真又好假又好，做公關Show都好，最緊要係場Show做得好睇！甚麼叫做「公關」，公關就係公共關係，即係你與社會大眾的關係。如何搞好你與社會大眾的關係？就是不離地、要貼地、令大家覺得你能夠觸摸得到、你的行為能夠引起大家共鳴！

全世界每一個城市都有最地道的地踎大排檔，正如Anthony對照片的描述：「Low plastic stool, cheap but delicious noodles, cold Hanoi beer.」(翻譯：矮膠凳、便宜但美味的麵、冰凍河內啤酒！)廉價的地道街頭風味小食，不單只窮人平日會去食，就連有錢人都鍾意去食。小店的風味和溫情，誰人不愛？無人話下下要去乜嘢大酒店、五星級米之蓮高尚餐廳食嘢。

先至叫好。去地道小店食宵夜吹水，歎支啤酒，不管在越南、在香港，乃至全世界，都係最貼地之舉，貴為一國總統，你能夠輕輕鬆鬆咁做，自然關公都鍾意你！

香港原先的領袖，就係跟美國這種世界級領袖同等級的。記起昔日彭定康初到香港擔任港督，都特意去路邊舖頭仔食個蛋撻影張相畀大家睇！駛乜旅遊發展局花幾百萬宣傳香港？各大媒體自然會把彭定康食撻圖流通全世界，世界各地的人自然會知道香港的蛋撻係好嘢，要來吃！

今時今日香港的所謂領袖是甚麼級數？貴為旅遊發展局主席的林建岳，竟然出口賤視香港本土地道美食，話乜嘢雲吞麵檔拿米之蓮佢唔服。離地到咁都有！首先，本地平民人人愛吃的美食，根本唔駛外國評級機構來貼金。再講，越平凡的美食，越要花功夫，越顯不平凡。你以為一碗雲吞麵簡單嗎？先講塊雲吞皮，如何皮薄又包得住餡料已經大有學問。再講雲吞餡，豬肉和蝦要保持新鮮。都未去講廣東麵之講究，還有淆那湯底之執着。總之，一碗雲吞麵，每一個步驟都係心機，這門傳統民間手藝係需要店主一代又一代承傳下來先至讓大家有得食。而外國遊客最喜歡品嚐這些民間地道風味，身為旅遊業的領袖，竟然賤視！

最後我想講一講，奧巴馬宵夜桌上的越南街頭小食，曾幾何時，都係香港的地道街頭小食。係英治時代，香港跟越南的關係頗深。除了大批越南難民滯留在香港外，很多越南華僑都在香港居住。當時很多越南人或越南華僑在香港開小店，供應廉價又好食的地道越南菜。像我兒時住九龍城，很喜歡和家人去樂富的熟食中心的小店食越南嘢，像生牛肉河粉、生菜包越式春卷，十分好吃，這些菜式正是奧巴馬宵夜桌上的美點。

可是香港這種地踎越南小店已經幾乎絕跡，有的只是一些越南餐廳，但已經沒有那種街頭風味，價錢又不便宜。另外，一啲所謂老字號越南餐廳，其實做得好差。奧巴馬一張越南宵夜圖，同時勾起很多香港人的過去美好回憶。

作者：黃一恒（本文章由聚言時報授權提供）