結婚係人生嘅終身大事，當然就係要搞得好好睇睇，確保婚禮當日要無野甩漏先得架啦！但講真喺婚禮當日由朝早到夜晚，基本上大家都係無得休息，而且唔少環節更加係絕無take two，咁究竟事前新娘子應該要做好咩嘅準備，先可以確保當日完美無瑕呢？
1. 小心揀接待處放既禮物
參加婚禮既來賓一般都會喺接待處放一啲回禮既禮物，但你大概會知道你請嚟既來賓佢哋既口味，繼而會估到佢哋鐘意啲咩；因為如果啲來賓揀睇到啲未必佢哋心水既禮物時，如果佢哋唔要的話，咁好容易造成浪費，甚至日後要特登送返回禮俾對方的話，咁就唔好啦。
2. 慎選用嚟「打底」既內褲
唔少人係著婚紗之前，都要修靚自己身型，用盡一切方法令自己著婚紗著得最好睇。既然係咁，就應該由內到外每個細節都要講究啲喇，講緊既係你用嚟「打底」既內褲。因為有啲婚紗係比較貼身，又或者用少啲、輕啲既布料去整，咁新娘就要特別留意，最好就係揀啲無咁透同近似隱形既內褲「打底」。
3. 唔好哂錢做美白牙齒既療程
新娘貪靚係人之常情，但有啲人要追求完美，身上每個細節，只要係見人既都要最靚。咁所以，有啲新娘會特登去整白自己啲牙，但其實唔使特登花錢去牙醫診所做啲甚麽美白療程架！只需要早啲郁手，大概婚禮舉行一個月前，每晚都貼美白牙貼，咁就okay架喇！
4. 婚禮前1星期先做個Spa
要籌備一個婚禮所需既時間好長，尤其愈接近婚禮當日，一對新人就會愈大壓力同愈忙，但係，就算幾忙都好，千祈唔可以忽略充足既休息，話哂都要喺婚禮舉行之前令自己進入最佳狀態；而要令自己以最好既一面示人，就當然唔可以待薄自己，花啲錢去做個Facial或者Spa。
5. 影相時隨身拎住支水
婚宴開始之前，一般都要同所有來賓輪流影合照，無論佢哋夾埋同一個時間嚟又好，抑或分散唔同時間嚟都好，做新娘既一定都要企喺台上面standby；呢個時候，唔好話無得食野飲野，影相時被幾廿盞燈照住時，分分鐘企到出汗。為免你企喺台上會太熱，最好都係拎定枝水係手穩陣！
6. 記得留定啲野俾自己食
去過婚禮既朋友實知道，結婚當日最忙既一定係作為主角既一對新人，預咗要成場走，參加婚宴時分分鐘忙過酒店啲侍應，事關你要逐枱去同人敬酒之餘，仲要預咗見到唔同人，呢呢個朋友吹吓水，轉頭又同另一個親戚講多謝，唔好諗住會有得坐低抖喇。所以，都係奉勸你婚禮始之前，叫侍應預先留定啲食物俾你，等你隨時充飢。
7. 記得叫人留起蛋糕
結婚蛋糕無錯係有準備到，但認真一對新人真係邊有時間食丫，除左影相個一刻個一啖仔。所以如果你想自己都有份食結婚蛋糕，而且唔想晒左個蛋糕嘅話，就記得叫場務幫你地留起，等婚禮之後可以自己食番。
8. 搵個伴娘跟住自己
著住笨重嘅婚紗、晚裝，基本上去到邊都係好麻煩，特別就係要去廁所嘅一刻。所以到婚禮嗰一日，最好就係安排其中一位姊妹跟住自己打點一切，咁就會更加方便，去邊都無咁難搞。
9. 將補妝用嘅唇膏放喺另一半嘅衫袋
就算你嘅化妝師技巧有幾好，難免喺某啲時候，你都會想補一補自己嘅唇妝，令自己睇上去精神一啲，同唔會口唇睇上去乾到爆裂咁核突。而由於你自己唔會拎住袋仔同埋無衫袋，所以就記得請另一半代勞拎番枝唇膏，等你可以隨時拎黎用。
10. 結左婚就即刻去度蜜月
有啲人結左婚之後，會選擇首先拎一個短假期輕鬆一下，之後先至抽時間去番個時間較長嘅Honeymoon。雖然咁樣諗好似好理想，令你地好似有兩個屬於自己嘅假期，但礙於工作所限以及需要為組織家庭未雨綢繆，基本上去左短假期之後大家都好難再抽時間去一個長旅行。所以總括黎講，最好都係結左婚就即刻去度蜜月較好。
11. 婚禮當中都要休息一下
婚禮對於好多人黎講都係非常匆忙，根本無咩時間係屬於自己，需要滿場飛應酬賓客，幾乎係無喘息嘅機會。雖然大家都知道婚禮當日係超級忙碌，但記得盡可能都要比自己停一停休息一下，等自己可以記得自己Big Day發生過咩野事同有咩人同自己慶祝，為自己留下珍貴回憶而並非需要由相片話番比自己知當日發生左咩事。
