一大朝早爬起身由新界過海去港島番工，話就話朝9晚6，但喺香港番工有邊個唔需要OT架？番到屋企仲有咩時間丫？沖完涼都12點上得床瞓喇... 然後呢？又嚟過新一日循環，總之就係無得休息囉！

久而久之，皮質醇同腎上腺素指數就會因為工作同家庭壓力同時影響之下提高，令健康響起警號之餘更會令人容易變老，睇落比自己實際年齡老左成十幾廿歲你都咪話唔驚！

但究竟咁樣係唔係就代表左你無辦法減慢自己衰老嘅速度呢？研究似乎就有一個令人意外嘅發現，發覺原來荷爾蒙當中嘅DHEA（dehydroepiandrosterone）係能夠有效抗衰老，以及減壓。咁究竟咩野係DHEA呢？

▼乜野係DHEA？▼

DHEA全名為脫氫表雄酮，係一種類固醇激素並主要由人體嘅腎上腺、生殖器官以及大腦所產生嘅一種物質。當人體所意識到嘅危機感已經退卻嘅時候，DHEA就會起到關鍵作用，能夠反映出一個人喺減壓方面嘅能力。

研究指出當女士覺得疲累、身體因壓力感到疼痛無力嘅時候，佢地嘅DHEA數值都會較低。此外，DHEA數值偏低嘅人士亦通常較為悲觀，而且更係常見於長期受壓嘅人士身上。因此從醫學嘅角度嚟講，DHEA就係年齡以及健康嘅一個重要指標。

▼DHEA水平高低，對健康有咩影響？▼

假如一個人嘅DHEA數值處於正常水平，佢地嘅外貌就會同實際年齡成正比，自然睇上去較為容光煥發同精神。相反當一個人嘅DHEA數值比正常嘅低，睇上去就自然會較為憔悴，而且比實際年齡老得多。

而除左能夠阻止衰老之外，將DHEA維持喺較高水平其實更能夠預防糖尿病，避免因壓力而令皮質醇上升，從而引起血糖及胰島素過高現象。此外由於DHEA能夠抑壓對壓力所作出嘅反應，因此同時亦能夠降低患上癡肥嘅機會。更甚嘅係研究更指出，健康嘅DHEA水平更能夠對抗自體免疫病，增強免疫力，有機會預防癌症發生。

▼如何提高DHEA水平？▼

雖然目前喺市面上有唔少標榜能夠提高DHEA嘅營養補充品，但係無論係咩原因都好，始終從日常飲食中攝取足夠嘅DHEA都係比食藥丸可取得多。而且係任何情況之下，都唔應該喺未有徵詢醫生意見下胡亂服用荷爾蒙藥物，因為咁樣做係會令腦部無法適應，對自己身體造成危險。

要提高個人嘅DHEA水平，最簡單就係要重新檢視一下自己每日嘅餐單，從日常飲食中攝取能夠提高DHEA嘅天然食物。例如：

．喺每日嘅餐單種儘量攝取唔同有益嘅脂肪，令身體產生適量膽固醇，從而提高DHEA含量。除左紅肉之外，果仁、含有油分嘅魚類、牛油果、有機雞蛋、希臘乳酪都係唔錯嘅選擇。

．減低進食含糖食品就能夠有效抑壓焦慮感，同時將膽固醇維持於健康水平

．早餐要含有蛋白質，咁就可以穩定個人情緒及神經系統健康。

更重要嘅喺日常生活裡面，都一定要保持心境開朗，用輕鬆嘅心情看待事物，笑多啲都可以有助提高DHEA水平，對抗衰老以及維持健康。