搭飛機時你最鐘意做啲乜？有人會盡情享用機上既娛樂設施，有人就情願利用呢幾個鐘去瞓一陣，抖足精神落機去玩。但係，機艙始終唔係自己屋企，邊有得話瞓就瞓得著？下次搭飛機記住以下10個Tips，包你全程瞓得好！
1. 跟返你平日瞓教個時間
我哋每日都有個固定既作息時間，咁到時到候就會眼瞓同容易瞓得著。所以，如果你要搭飛機，最好就安排返接近你每晚瞓教時間既班次；如果就唔到時間？最好就臨上機之前做齊哂你平日瞓前既動作，例如刷定牙，或者睇吓書，等成個人慢慢進行睡眠狀態。
2. 慎選你喺飛機上面著嗰套衫
入到機艙雖然各有各做自己野，但始終都會見到街外人，咁又無理由特登著套睡衣上機既……不過，一套舒服既衫，原來都有助你去入眠，建議你可以著一啲鬆身、質材舒服既運動套裝就最好喇。最後記得著多對襪，咁先可以保暖。
3. 揀啱你坐邊個位
呢個又係同時間競賽既環節，強烈建議你上機前自己個想坐既位。成架機一般分左、中、右三邊，最好就係揀一啲你平日最易瞓得著既位置；一般嚟講，近窗口位既座位都比較闊落。
4. 飛之前瞓少啲
喺機艙瞓一定唔及喺屋企或者酒店舒服，唔少人亦會因為呢個原因難以入睡，咁所以，要易啲瞓同瞓得好，最簡單直接既方法一定係令自己好眼瞓！上機前一晚就唔好瞓咁多，起碼瞓少一半時間，即係由平日瞓8個鐘減為每日瞓4至5個鐘就算。
5. 上機前一晚keep住做伸展運動
要易啲瞓著，無非就係要俾你成個人有個想休息、放鬆既意識，呢啲時候個人就要keep住放鬆mode，最好之前幾個鐘做一啲伸展運動，或者瑜伽，因為呢啲活動都可以令你身體既生理、心理都準備進入休息狀態。
6. 記得帶頸枕、眼罩
如果你瞓得著，都要小心最好唔好令自己瞓瞓吓中途醒咗，因為一醒咗又要再花段時間先可以入睡；要避免出現呢個情況，最好就係瞓之前戴返個眼罩，唔使「見光死」整醒自己，另外都要戴返個頸枕，咁就確保條頸唔會痛。
7. 聽住歌瞓
有啲人瞓覺時要一粒聲都無，有啲人就反而怕太靜瞓唔著，雖然呢啲習慣都係因人而異，但只要場景換咗係機艙入面的話就唔同講法喇。喺一個又細又窄既空間入面，人人發出既小小聲都有機會演變成噪音，所以穩陣起見，建議你都係聽住歌瞓比較好，咁係最有效隔走外界聲音既方法。
8. 最傳統既瞓法
呢個傳統瞓法，相信係坐邊個位都可以做到既，就係拉後張椅，同埋腳踩住腳踏，盡量令身體打平，咁就肯定係最舒服。
9. 其他「進階」瞓法
即使係一個小小既座位，每個人既瞓法都可以好唔同。有啲人鐘意捲埋喺個位度瞓；仲有一種就係「VIP」瞓法，呢種瞓法唔一定要商務或者頭等艙先做到，只要你坐緊既經濟艙執邊係無其他乘客就得喇，咁你就可以成個人打橫瞓哂三個位。
10. 唔好買零食或者野飲
搭飛機好容易口痕，想食啲小食或者飲杯野，但如果你食到好飽，或者飲啲好醒神既野，例如咖啡、茶咁，就一定好難瞓得著或者瞓得好。所以，如果你想喺機上有覺好瞓，勸你都係忍下口算。
