面試見工之前，當然要有充足既準備功夫，但點先可以令面試官有個好印象，同時又有啲咩因素會「阻礙」你成功呢？留意以下呢12樣有機會影響你面試成功既原因，有啲你可能聽都未聽過！

1. 你獲安排既面試時間

有專家指出，逢係星期二早上10點30係最好既面試時間，事關呢個時間被指做嘢最好效率，人哋又唔會覺得太趕，夠佢check哂e-mail，食埋個早餐，一切準備好哂先見你。咁咩時間最唔著數？當然係放lunch前後，一係就趕住食飯，一係就要你等勁耐。

2. 面試當日既天氣

多倫多大學既研究人員，Donald Redelmeier同Simon D. Baxter之前講過，有讀醫既應徵者好怕落雨天去見工，因為覺得成功機會比晴天低。點解呢？有數據指，無論面試既職位係初級定高級員工，落雨天舉行既面試，分數會比好天舉行既低出1%。唔係行行都係咁掛？！

3. 提早去到公司

守時當然重要，見工唔好遲到，但同樣唔可以早到！早幾多？例如你早到成30分鐘，恐怕會影響你成功既機會喇！因為咁早到，好容易俾人覺得你過份緊張，反過來俾面試官壓力；多咗時間，不如周圍行吓放鬆啲仲好。咁早幾多最好？幾分鐘至5分鐘夠哂架喇！

4. 大堂等電梯時你既動作

唔好以為同面試官講野嘢嗰刻，面試先叫開始，早喺你等緊電梯上公司嗰時，你就要注意自己既行為。因為你永遠唔知，企你隔離嗰位係咪就係面試官。由嗰刻開始，你講電話既語氣，有無邊行邊食嘢飲嘢咁，都有機會成為你俾對方既第一印象。

5. 未叫你坐就坐低？

你同面試官互不相識，點可以令對方有個好印象呢？就係一啲細微位落啲功夫，例如喺面試官面前俾啲尊重，當佢行入嚟見你時，千祈唔好坐係度一舊木咁；最好先企番起身，等對方叫你坐時，你再坐番低都唔遲，睇落點都尊重啲。至於同對方傾計時，最基本一定要有眼神交流呀！

6. 笑多啲＝好？

成日聽人講，見工時記住俾啲笑容，但俾幾多先啱呢？外國有研究人員曾經為大學生舉辦過模疑面試，呢班大學生扮演報館記者、經理等應徵者；佢哋發現，見呢類工時，若果面試者笑得太多或者太燦爛，面試官反而唔多受落。所以，記住就算笑，都要笑得啱（即係唔好大笑），同睇你見咩工。

7. 你既身體語言

身體語言可幫助溝通，原來仲代表你係咪投入同對方傾計。所以，面試期間，介紹自己時不妨加啲身體語言，例如手勢，方便對方係短時間內理解你講乜。但要記住，過多身體語言，就會令面試官覺得你太緊張，甚至太騷擾；簡言之，愈自然愈好。

8. 加強自己個「勢」

好多時聽人講「氣場」、「氣勢」呢啲字，直接影響人哋對你既觀感。見工時，你要俾面試官一個感覺，話佢知你係有能力勝任呢份工，同時有足夠能力影響其他人。咁點先可以「儲到」呢個「勢」？其實係你出門口之前，或者面試前5分鐘，對住塊鏡不停鼓勵自己，可以分散注意力，令你無咁緊張同時提升你既自信。

9. 你握手既力度

同你第一次見面之後，一般都會握手示好，但其實呢一吓握手都可能係一個試探！點解？因為同人哋握手，加上臉上一個笑容，都正好能夠表現出你夠唔夠信心；所以，握手無論太大力，或者太細力都係唔適合。

10. 你點對公司接待處職員

見人事部、部門主管之前，面試者一般先經過接待處同你通傳。網上購物平台Zappos既行政總裁Tony Hsieh講過，自己公司面試時，會安排專車接載遠道而來既應徵者，去公司見工。無論見工表現點，事後如果知道應徵者對呢位接載既司機無禮貌，公司係一定唔會請佢。所以，其實見到人哋公司每位職員，都應該表現得禮貌啲。

11. 平日有少少自戀或者自我感覺良好？

面試就係俾個機會你表現自己，sell自己，專家就話，平日比較自戀，又鐘意自拍，或者喺社交網絡上表現自己既人，一般係見工時都有較好表現，因為佢哋有自信，仲識得點樣推銷自己。

12. 有無成日心不在焉

面試幾長都好，千祈唔好分心，除咗盡量答啱哂面試官問既野之外，記得唔好望錶或者電話，如果唔係被面試官扣哂分。仲有，面試期間記得熄咗電話，或者較做靜音，確保唔好有嘢騷擾到你同面試官既交談。