香港人去旅行礙於假期短暫，一般黎講都只能夠踏足東南亞各國，好難先可以去到歐美等等嘅國家。雖然去日本、韓國、台灣、泰國嘅次數已經多到數唔到，但你又有冇清楚了解過自己去到人地嘅國家嘅時候，有冇大意咁犯左人地國家嘅習俗都唔知道？
見大家呢一期興去日本同韓國，今日小編就送個你一個「日韓旅遊禁忌懶人包」，比你check清楚自己去到有冇失禮自己，等您以後可以安心咁繼續行程啦！
▼日本▼
1. 千祈唔好放筷子上碗
對於日本人黎講，使用筷子嘅禮儀係非常講究，例如佢地係絕對唔會將筷子放喺飯碗、碟子之上，亦都唔可以用筷子插入食物裡面。此外，咬筷子同樣都係唔禮貌兼且唔衛生嘅行為，所以一定要緊記於心唔可以犯。
2.食壽司一定要一啖食晒
壽司係日本料理中最為人熟悉嘅一道菜式，而對於壽司師傅黎講，一口食晒一件壽司先代表你認為壽司美味，而且係對師傅以及食材嘅尊重。因此就算你係女士，都唔應該將壽司分開兩口食完呀！
3. 注意當地扶手電梯站立文化
日本唔同地區對於扶手電梯站立位置，都有唔同嘅做法，例如東京就係企喺左邊，右邊就係快速通道。相反去到大阪，大家就係企喺右邊。所以去到扶手電梯之前一定要睇清楚先呀！
4. 鐵路禁止交談講電話
日本唔少嘅公眾場所，例如替鐵路或者巴士，都唔會有人大聲傾計，而且更唔會有人響電話、傾電話。所以為左尊重人地本身有嘅文化，確保大家都安靜嘅個人空間，去旅遊嘅時候都一定要嚴格遵守。
5. 埋單要將錢放喺碟盤
對於埋單呢個動作，大家其實都不以為然覺得只要將錢交到店主手上就可以，例如直接將錢放入店家手中，但係其實將錢放入人地嘅手裡面，喺日本並唔係有禮貌嘅做法，正確係應該將錢放喺碟盤上面等店家點算，並從盤子中拎番找續。
6. 影相唔好影埋人入鏡
日本人非常重視個人私隱，而亦因為呢個原因，喺旅遊嘅時候影相記得唔好刻意影埋人地入鏡，事關對方有可能係非常介懷的。另外亦都要留意假若見到好得意嘅小朋友，都記得要徵求對方家長同意先好影相。
7. 紋身有機會被拒絕浸溫泉
喺日本嘅溫泉文化裡面，大部分嘅溫泉都會禁止有紋身嘅人入內浸泡，有啲更加唔會比有紋身嘅人進入店內 。就算你有幸矇混過關，入到去都只會比其他日本市民投以奇怪目光，不受歡迎。
8. 入屋即除鞋
無論你去到乜野嘅場所，一入屋就記得要除鞋，另外都要記得留意自己嘅襪子，避免展露出穿窿襪子獻醜。
9. 講完乾杯唔好飲晒成杯酒
有部分人應接中國客多左，就習慣覺得講完乾杯真係要乾晒杯裡面嘅酒先至係禮貌嘅表現，但其實乾杯喺日本人眼中，只不過係聯誼活動嘅開場白，所以只需要飲一兩啖就已經足夠架喇！
▼韓國▼
1. 泡菜係傳統文化
泡菜除了是韓國最傳統嘅料理之外，更加係大韓民國文化嘅象徵。雖然泡菜嘅味道辛辣且酸，唔係每一個外國人都能夠接受得到，但如果你係非常喜愛泡菜嘅話，當地人自然會對您非常欣賞。
2. 注意餐桌禮儀
韓國人嘅匙羹係用黎食飯或者飲湯，筷子就只能夠用黎夾菜，更甚嘅就係食飯個時唔可以抬起飯碗。此外去人地屋企作客，都記得唔好將人地嘅飯菜食清光，因為咁樣係代表對主人家不敬架！
3. 入內都係要除鞋
同日本人一樣去到韓國人嘅處所門前，就一定要除鞋，因為喺傳統韓國文化當中，地板就係佢地生活作息嘅地方黎，食飯、瞓覺都係喺地板上面。所以假如你著住鞋咁入去人地屋企，就會整污糟晒人地間屋，毫無文化更無禮貌。
4. 飲酒有獨特規條
韓國人飲酒方面有嚴格嘅規條，例如幫人倒酒嘅時候，就必須將一隻手放上心臟位置，又或者將倒酒嘅手舉高至膀頭之上先係代表尊敬。
5. 講價要睇地方
好多人去旅行習慣左會講價，但其實韓國一般店鋪都係唔會受講價呢個方式，除左東大門或南大門之外。但記得講還講，千祈唔好講完一輪先黎話唔買，如果唔係比人鬧死都有知！
6. 時有比人逼住嘅感覺
南韓城市其實人口算係非常密集，所以好多時候都會同當地人有少少嘅碰撞，幾乎每日都會感受到比人逼住嘅感覺。唔小心撞到人幾乎都係韓國人嘅日常，所以輕微嘅話都唔需要覺得過分抱歉，但就要記住注意長者或者小朋友嘅安全。
