我哋日常生活入面，除咗食飯、瞓教、去厠所係例行公事之外，仲有沖涼。我哋平均一日沖一次涼，甚至有人會喺返工返學之前都沖一次，覺得咁先夠乾淨。但係，原來呢個做法係錯架！近排有專家建議，每個禮拜沖一至兩次涼就夠。好難接受呢？不如聽吓佢哋點講。
洗走身上健康油脂、益菌
美國哥倫比亞大學護士學院傳染病專家Elaine Larson就話，好多人以為日日沖涼先乾淨、健康，但其實喺細菌學角度嚟講，沖咁多次涼反而會有產生更多問題。佢話，一個禮拜沖一至兩次涼就夠，因為沖得涼多會洗走哂身上既油脂同益菌，令細菌有機會入侵體內。佢又補充，除非因為身上面有臭味，咁的確係要沖涼。但如果你以為沖多啲涼可以無咁易病？咁其實洗手已經得喇。
沖涼沖呢啲位就夠
好喇，到你真係沖涼既時候，都要留意只係沖身體某啲部位就夠。喬治華盛頓大學皮膚醫學副教授C. Brandon Mitchell同樣話，日日沖涼真係無必要，而且沖嗰陣，只需要洗腋下、臀部同脾罅位呢啲會分泌強烈氣味既位置就夠。
成日想沖涼？可能只係被清潔用品廣告影響
一時之間的確好難接受，日日沖涼唔好呢個講法；但有無諗過，我哋之所以咁想沖涼，其實只係受清潔用品公司既宣傳、廣告所影響呢？有唔少沐浴露、洗頭水、或者潤膚露廣告，都好鐘意強調沖完涼後會有咩感覺；難怪有調查指，六成受訪女性每星期沖3至5次涼，主要都係為咗保養皮膚。
各國人沖涼次數都唔同？
早前歐洲一間公司Euromonitor做咗個國際研究，指各國人平均沖涼次數接近七次，巴西人同哥倫比亞人每日沖多過兩次涼；而澳洲、墨西哥、中東國家、印尼人們每個禮拜就沖大概八次。
邊個國家既人一星期沖一次涼？
根據英國紙巾製造商SCA公司一項目調查發現，而家既英國人已經唔再日日沖涼，當中有四成男性，三成以上既女性無日日沖涼既習慣，而超過一成人更承認一星期只沖一次涼。蘭開斯特大學社會學家Elizabeth Lancaster話，其實英國人日日沖澡既習慣一直維持咗成百幾年，但而家既佢哋愈沖愈少，其中過半數英國人每朝起身後，因為太懶或者無時間，所以索性唔沖涼，但專家認為呢個習慣反而令佢哋更健康。
