未入職已經準備被人炒

尋日講到HR阿頭壓人價好叻，今日阿頭私底下同我地講，要整走會計部新請果班人。

成班同事都O晒嘴，唔係話我地HR未試過迫走人，迫走通常都係啲極乞人憎果啲，例如一星期總有一日請病假果啲，但新仔喎唔係咁玩人卦？未入職就要迫走人？唔岩就不如唔好請啦，請完人又炒人，好玩咩？

重點係唔係針對一個人，係針對成個會計部新請既人，有啲係FRESH GRAD，有啲仲係特登轉工嚟，唔係咁玩人丫？

但我地阿頭話，會計部個阿HEAD踩親佢條尾，要趕走晒佢新請班人，等佢無人用，寫花佢份REPORT，話佢唔識管下屬，要佢收皮喎。

唔需要我地HR會用咩手法迫走人，呢啲嘢廢事教大家。而家個問題係要我地迫走一班未入職無做錯事新請返嚟既人，有個仲要係岩岩太太有左小朋友，轉職嚟我地公司既準爸爸。

唔聽我地阿頭講迫走會計部班新人我就死，聽阿頭講要「開工做嘢迫人自己辭職」我驚第日生BB無PAT PAT！

網友唔洗問我係揀邊項，我啲同事全部都已經度緊橋點迫走班新人。