私人銀行裏面,十個 ultra-high net worth clients,即是所謂的超高端客戶,有九個都是白手興家的老闆或承傳祖業的富後代。香港地,要靠打工打到可以做 private bank 的頂級大客,實在沒有幾多人,但和黃大班霍建寧肯定是其中一個。

霍生有冇廿億身家,冇人可以肯定,但據朋友透露,淨係佢屋企個客廁掛住嗰幅畫,都成千幾萬。唔好覺得霍生大洗,千幾萬,只係佢年薪嘅零頭。

根據 2016 年的最新數字,霍大班上年的年薪終於二字頭,準確數字是 2.16 億。比較再上年的1.96 億,淨係差額都夠你買五架法拉利。

不過,如果你只是羨慕霍建寧的年薪,其實焦點擺錯了。二億年薪當然讓人垂涎欲滴,但沒有李嘉誠,又豈會有打工皇帝這個神話?霍建寧係叻,但真係叻到「值」兩億一年嘅,全香港又是否只有霍建寧一個?其他公司嘅CEO 唔叻?其他公司賺唔到錢?點解係得長和系專出打工明星?調番轉講,霍建寧和他的星級戰友做到今時今日仍未言休,又是否真的只在乎錢?

講真,一份工作的性質,A 公司同 B 公司唔會差好遠。你係負責睇住張 balance sheet 嘅,A 公司同 B 公司嘅balance sheet 都係咁睇;你係跑數嘅,A 公司同B 公司嘅 commission 又唔會差好遠。既然工種差不多,點解有啲人打工會打到叫苦連天,有啲人就算明知自己 underpaid 都仍然樂此不疲地 OT?原因好簡單,we don’t love or hate the jobs,but we will love or hate our boss。換句話說,如果你真係好鍾意份工,其實係因為你好鍾意你老細。

點先為之一個好老細?唔使好複雜,以下兩項優點,擁有其中一樣,已經係一個「絕種好老細」,簡稱絕細。

冇幾耐之前,UBS 其中一個部門嘅其中一個老細,送咗一個 Birkin 畀佢秘書。一個八萬蚊嘅殿堂級手袋,就算你畀得起八萬,都要排十年隊先排到你,而家呢位老細就咁就畀咗個 Birkin 佢秘書。潛台詞係乜?「個老細同個秘書有路!」個老細係女人喎。「哦,咁吖,佢搞 les 囉。」佢係唔係 les 我唔知,但一個絕細,對你就是會這樣慷慨的。

「慷慨?講到尾咪又係錢。」可以咁講,但 precisely speaking,係以錢作為媒介去表達一份心意。試諗吓,佢大可以唔買個袋畀你,或者就算買都唔使買個咁靚嘅畀你。而家人哋係,由自己銀包攞八萬蚊出嚟,再利用自己喺 Hermes嘅 VIP status,專登訂一個手袋畀你,仲要係你鍾意嘅顏色。絕細的慷慨,是對你一份非言語所能表達的肯定和重視。

嫌 UBS 這個例子太離地?好,我哋講吓髮型師。

金融界猛人莊友堅又係出名堅慷慨,年年 annual dinner 都唔知攞幾多十萬現金出嚟抽獎,但我唔係想講佢,我係想講佢幾年前開嘅一間 salon 裏面嘅其中一位髮型師。

開始搵阿 Rayne 剪頭髮,係因為朋友話阿 Rayne 幾百蚊嘅收費剪到幾千蚊水準。我當然睇唔出佢係唔係剪到幾千蚊嘅水準,不過就覺得佢好知道乜嘢嘅髮型適合你。開頭都唔覺得佢有乜咁特別,咪又係後生仔一個,直到某一次,佢同我講咗一番話,我對佢另眼相看。

因為佢識得飲水思源。

不是太記得怎樣打開這個話題的,Rayne無情情提起他以前的老闆。他說這個老闆叫 Herman,是髮型界裏面的 best of the best,四大天王有兩個都是他的長期客仔。「佢好畀心機教我,成日都迫我學嘢。」Rayne 說。 點樣迫你學嘢?我好奇問。他想了想說:「Herman 叫我幫個客吹頭,我問佢應該點吹,佢話叫我自己諗吓。吹完之後佢實唔滿意,然後就話應該係咁係咁。迫吓迫吓,每次同客吹頭之前都會諗一諗,因為驚 Herman 又鬧。」Rayne 提起這個經常鬧人的老細,眼神充滿著感激,最後還肉緊的說一句:「佢真係好好,冇佢冇我。」

現實世界永遠係衰嘢多過好嘢,所以可能到而家你都未遇過以上呢啲咁好嘅老細。如果緣份未到,要快為自己爭取,例如上 jobsDB 然後 update 一下自己個 profile,隨時準備迎接人生新一頁,也許絕細就在不遠處等著你。

當然唔係話,遇上一個絕細就一世都唔使轉工;只不過係,當你人生真的遇過一位良師,他日就算蟬過別枝以後,你也會很自然地,在別人面前提起他的好,憶起他的訓誨,並不其然地肉緊一句:「冇佢冇我」。

 


 絕細(葉朗程)

 https://www.facebook.com/marcusyiphk