【韓食Cafe在觀塘】好好HEA!! 減肥必食 ~ 奶油年糕多士

觀塘愈來愈旺， 今日阿太帶我去食「新‧韓Cafe」， 又是在我熟悉的apm旁邊一商業大廈。

阿太：「E家實啱你啦， 新開2個星期， 韓國嘢又夠HIT， 你睇十幾部大電視播韓國MV， 幾有Feel」(係囉！ SY仲睇到笑騎騎添)

這裡店員服務態度很好， 因為EQ低的我埋怨:「拉芝農夫包又無， 紫薯雪糕多士又無...」

店員親切道歉：「農夫包因為連續幾日假期， 返唔切貨， 多士就因為上晝太多人點...唔好意思」同場又有另一對小情侶， 同樣理由憤然離場， 相比我原來已經算忍耐喎。

柚子蜜糖雞翼炒年糕($60) 是店員推介， 她說:「除咗農夫包， 最多人點嘅就係佢， 不過少少辣， 可能小朋友會唔啱喎」

結果很有趣的， 雞翼有甜蜜糖微酸柚子， 而辣則全交給年糕的份兒。

看來小朋友已漸漸被鍛鍊得少辣也可以接受...SY：「汽水...汽水， 有汽水就可以食到辣囉， 我都係食雞翼好D， 但都要飲汽水」(呃汽水飲你至叻啦)

阿太:「好明顯分開炒啦！」我解釋：「可能佢諗住有小朋友， 分開炒， 咁佢都食到雞翼囉」(點解我會幫佢解釋嘅？？)

點解「瘋狂炸雞Combo ($80)」， 我一度懷疑：「係米炸雞三食， 三種不同炸法呢？」阿太：「咁正？ 不過周圍好多人叫喎」

結果到場， 分別是普通炸雞， 一般炸薯角， 及即食炸魚柳...SY：「Yeah！有薯條食， 好食呀！ 我鍾意點茄汁， 同E個黃色(蜜甜芥末)」

個仁意見...都係之前大角咀醒哥間炸雞好食好多， 仲平D添！！

最後來一個是阿太點名指明的「鮮果冰棒水冷麵($58)」， 阿太：「有兩條生果雪糕咁得意， (SY：雪糕我鍾意喎)」

實物一出現真章， 十足整容前後的對照， SY：「點解人哋條雪糕咁長， 我哋咁短嘅？...鹹鹹地嘅？ 都唔係雪條嚟」， 阿太向店員查詢：「係米應該有醋呢？」

店員答：「我估應該無， 因為我哋大廚跟韓國朋友， 去咗當地拜師一個月， 又周圍食偷師， 所以味道都好韓國嘅」

我最討厭食冷麵， 又涷又淡的麵， 破例一次， 就由得它留下半碗啦， 因為我想食甜品「黑森林朱古力奶油多士($40)」

今次要讚女店員識貨， 因為她對我說：「你隻小丑公仔好得意， 新買架？ (我：係呀， 尋日先買， 小丑咀大襯多士呀)」

三層麵包中間夾入兩片年糕及芝士， 中央面層有朱古力醬， 再灑滿朱古力粉， 賣相不錯...朱古力怪大叫：「一定好好食」

如果， 中間夾的是港式賀年年糕， 應該會更好食...因為表面的朱醬被小朋友全品嚐掉， 多士變得太啖...

煙煙韌韌的年糕很有減肥作用， 一家三口食完，  6小時後依然飽飽滯滯...是不是年糕太大片呢？ 今日終於明白「飽到上心口」的意思

食韓國料理， 可能真‧韓味的神髓， 未必一， 兩個月貨仔便可以學得到， 不過， 老實說， 你也不會期望元氣， 丼丼屋有日本靈魂吧！！ 朋友聚一聚， Hea著坐， 觀塘多一個選擇， 總好過無啦！