男神王宗堯 新廣告惡搞曲奇FFx

▲男神王宗堯 (Greg) 在踏入2016年後，繼續廣告當旺，至今已拍了香港寬頻、Extra香口膠及花王產品共三個廣告。

在新鮮滾熱辣推出的花王系列廣告中，他以堅‧王宗堯身份跟由四位毛記主播吳檸儁、安不尊、專家Dickson、東方昇組成的爆笑組合「FF的s」，合唱改篇自Cookies成名歌《心急人上》的《心急男人上》，五個男人穿着仿ffx的窄到嘔銀色連身衫上陣，另有同樣窄到飛起的背心及桃紅色運動套裝造型，在當年Cookies拍《心》mv的沙灘上載歌載舞，非常之毒，偶然擺個卜卜脆少女踢水甫，笑死。

廣告歌中二次創作的歌詞，亦提到Cookies四位成員，「秀髮到連吳雨霏都走開」、「我靚榴到連楊愛瑾都喜愛」、「連Stephy佢亦期待，傳穎都跟隊愛」，極之抵死；但主題其實是帶出洗髮露和洗面膏產品，男士一樣要乾淨企理，四正見人。

之前Greg增肥20磅拍《導火新聞線》，雖然已開始減磅，但未甩腩仔，他笑說：「當初話FF的s着緊身衣真係幾好笑，自己呢排未有時間打拳，大家都有少少肚腩好笑，最難係大家夾時間排舞，啲步法唔係好齊但好笑。其實成件事係認真做，去番沙灘拍，想做到一模一樣，錄音嘅時候亦盡量將唱法變成Cookies嘅唱法。」Greg更希望能在毛記台慶頒獎禮上現場演繹，「但要努力啲再排，收番個肚腩先，自己人大咗，肚腩難收好多，尤其係我咁鍾意食。」

對於今年廣告亨通，Greg感謝客戶支持之餘，不少朋友亦跟他說，四圍都見到他的廣告牌，Greg說：「呢排有《選老頂》、香港寬頻同埋香口膠廣告，嚟緊呢個新廣告應該都有廣告牌，我想睇吓有冇一個地鐵站，可以俾我一次過見晒去集郵，咁就好開心啦。」