番工除左怕會被逼OT無補水之外，另外最令人人見人憎嘅就係喺工作上遇上惡頂嘅麻煩同事，令自己捲入不必要嘅辦公室漩渦裡面，簡直係煩上加煩！究竟喺工作上面，最令人見到都想嘔嘅係邊幾類嘅同事呢？同埋遇到佢地又應該點算好？等我地即刻黎睇睇啦！
▼1號麻煩友－乜都要認叻嘅同事▼
無論你講緊咩都好，做晒research present出黎，公司硬係會有一個乜都要認叻嘅同事，乜都會扮晒專家咁出黎話你呢度唔岩、個度用錯方法去做。更令人反胃嘅係就算係日常無關痛癢嘅對話入面，都一定會搵個位黎扮自己博學多才，例如講開你自己病佢竟然都可以入個位話你睇個醫生廢，幫你斷埋診話你個醫生睇錯你。喂你咁叻，不如去做埋醫生啦！
點應付呢D乜都要認叻嘅麻煩友？當然最好就係喺做野嘅時候自己做足200%嘅功課，仲準備埋相關嘅reference令佢連0.01%嘅位都挑戰唔到你。如果佢仲係要認叻嘅話，咁就向住佢咩都唔回應，點頭恥笑佢就算啦！因為呢D人真係以為自己係天才，點都唔會醒架喇！
▼2號麻煩友－看得自己那麼高嘅同事▼
「你係乜水呀？你知唔知我係邊個？」去到大公司做就一定會遇到D看得自己那麼高嘅同事，自以為自己有一定關係、學歷、年資就個個都要奉承佢，個個都一定要知道佢係乜水。
遇著D咁既同事因為佢多數嘅職位都比你高，所以為咗唔好玩死自己，就千祈唔好將自己嘅不滿倒晒出黎比佢見到自己嘅底牌。更重要嘅係你要聰明少少捉到佢鐘意D咩，落少少鞋油扮同佢志趣相投，咁佢嘅態度就會軟化少少，工作上對住佢就無咁麻煩架喇！
▼3號麻煩友－Chok足24小時嘅同事▼
無論今日天氣係點、大家忙緊D咩，呢位Chok足24小時嘅同事每日番工嘅時候，都一定會擺晒個戰鬥格出場，行過就一定好似行Catwalk咁，有射燈照住佢咁，好鬼浮誇。更令人相當側目嘅係由於佢相當有自信，好多時候佢地更會趁機佔人便宜，例如對女同事講埋人地唔鐘意嘅敏感話題，之後仲同人講番講：「我玩下架咋！哈哈！」見到咁嘅畫面真係令人相當頭疼，心諗：「你變態架？」
要搞掂呢D咁嘅麻煩友，首先一定要做嘅係千祈唔好附和佢，如果唔係佢就會越黎越得戚，真係以為自己好風趣，講嘅野無傷害到人。第2就係當佢持住自己嘅自信再去煩住同事嘅時候，或者你可以出聲為同事解圍，令佢係人地面前大出洋相。對於佢地呢D自信心大晒但又非常無安全感嘅人黎講，你咁樣話佢佢就一定會驚到唔敢再講架喇！
▼4號麻煩友－當正你個位係佢個位嘅同事▼
明明將自己D野擺得好好地，人人個位都係得咁多架者，但有D人硬係會將佢自己D野越擺越過，用埋你未擺野D位。更令人憤怒嘅係有時自己嘅釘書機明明已經放左入自己個櫃筒入面，佢都會唔問就自己拎左去用，用完又唔還番。
要對付咁嘅同事，當然就係要先下手為強，唔理用咩都好總之就用野霸番屬於自己嘅位置先。另外如果佢不問自取，最好就係喺自己嘅文具畫上識別符號，咁你發現左嘅時候，就可以大聲同佢講「你無問過我就自己拎左去用呀？」，又唔怕比佢話番無證據用左你嘅野。
▼5號麻煩友－是非精嘅同事▼
辦公室無論人多定人少，總會有一堆是非精係咁講晒成間公司每一個人嘅壞話，扮晒知道每一個人嘅背景、歷史，咩都可以講一餐。
遇到呢類搬弄是非嘅麻煩同事，最重要係劃清界線，唔好加入討論。如果一大班人一齊嘅時候是非精開口講，最好就係去扮打電話行開，唔好招人話柄，搭沉船比人以為你都有份講。
▼6號麻煩友－講親野都好似開咪咁嘅同事▼
未見其人即聞其聲，遇著咁嘅同事，真係要準備定耳塞先可以集中精神做到野，因為無論佢地做緊公務定私人野，把聲都係非常之震撼，令人非常煩厭。
要解決呢個問題，其實真係最直接同番佢講，但當然係私底下講好喇，因為有時大聲嘅人其實係唔知道自己講野大聲左架！
▼7號麻煩友－恃勢凌人嘅同事▼
因為自己嘅職位高，持勢凌人嘅同事就會事事玩針對，將所有嘅麻煩工作送晒比你，包括食死貓。
要對付佢呢種人，最應該做嘅就係以其人之道，還治其人之身，同時受到任何壓逼嘅時候都唔好將自己嘅感受Show出黎，用自己嘅小聰明轉個彎煩番佢轉頭，到時佢就會嫌你有反抗力而費事搞你。
▼8號麻煩友－太過痴身嘅同事▼
無論你去邊度食飯、去廁所，佢都會跟到你實一實，之後當你忙緊嘅時候，佢又無啦啦Whatsapp你搵你R水吹，更嚴重嘅係放工都會等埋你先走！
如果你真係受唔住咁友善嘅對待，或者你真係需要同佢講講，無謂影響到自己工作同私人空間啦！
▼9號麻煩友－咩都要sd email投訴嘅同事▼
廁所無廁紙？Canteen野食唔好食？大門保安唔幫自己開門……等等等等……事無大小都要send email投訴左先？呢D人就最多係講多過做，剩係識投訴但有咩事就第1個走先閃人勁縮骨。
假如有一日你成為左佢投訴嘅對象，咁就email都唔好覆佢直接去到佢面前問番佢有咩不滿，對於佢地呢D鍵盤戰士黎講，面對面講佢就唔會咁得戚，仲會露出破綻等人知道佢其實係幾咁無理取鬧。
來源：huffington post
