韓國男人有咩好？

身邊好多朋友都好奇想知我個韓籍老公係咪好大男人，其實佢晌外國居住多年，已洗甩左少少大男人本色，佢會同我分擔家務、間中又會親自下廚、作任何決定都同我有商有量，所以佢係大男人得黎會識得「尊重老婆」既泡菜男。

但好老實，泡菜男大男人主義係眾所周知嘅事實，最極品嗰群真係完全唔做家務、食飯時要好似皇帝咁畀女人服侍、女友／老婆晌其他朋友前面要好似「鵪鶉」咁斯斯文文、唔鐘意老婆出外工作拋頭露面等等，唔係個個頂得順架。

即使知道有大男人呢個特性，身邊既單身女仔朋友都對泡菜男好有興趣，成日叫我介紹「噢巴」畀佢地認識，我都盡綿力去做紅娘，最近又成功拙合左一對港韓情侶勒。

究竟點解我地香港女仔對泡菜男咁有興趣？而泡菜男相比起「港男」又有咩優勝之處呢？以下係我既分析，不過要澄清一點，我並唔係話全部港男都唔好呀!

家庭永遠放第一位

大男人還大男人，韓國男人對屋企好有責任感， 屋企遇到咩野難題都好願意挺身而出去解決。只要同你有一紙婚書，承諾過會照顧妳，就會謹守承諾，難怪韓國嘅離婚率差唔多係全亞洲最低。而我個泡菜老公逢週末會盡量將所有時間留比屋企，佢亦好重視同屋企人共餐時間。相反，部份「港男」一接到豬朋狗友嘅call，9秒9仆到出去！老婆？貴姓呀？

有男子氣概 男人味重

即係我地講嘅好「Man」，我發覺無乜韓國男係Mama’s boy或者講野係娘娘腔，起碼我認識之中嘅都無，而韓國男人都肯為女人解決問題，有責任心、有承擔。同埋壯健嘅韓國男人都要服兵役，晌軍營度受訓完出返黎，男人味仲唔出哂黎咩！

港男呢？身邊有朋友真係好怕事，有咩事就搵個女人出黎頂，又唔捱得，搬少少野就話攰，擦傷少少又話痛，佢地老婆好似要做埋佢地「奶媽」咁執頭執尾！

阿媽老豆一定鍾意

大家都可能知道韓國人係非常尊敬長輩、老人家，對話都要用哂敬語，後生仔女永遠唔會坐地鐵嘅關愛座，被長輩訓話永無駁咀，「無大無細」晌佢地嘅世界絕對係死罪，所以帶韓國男友見屋企人，佢地一定勁「識do」，父母亦一定無「咋型」!

仲記得初次帶而家老公去同老豆老母食飯，老公著哂西裝，斟哂茶，同我雙親傾計氹到佢地好鬼開心，見面後老公好認真咁問我：「咁你父母即係批唔批准我地拍拖？」頓時覺得佢嗰種嚴肅同認真好鬼可愛!

懂得尊重女性 「毒素」較低

男仔同女仔傾計間唔中都會「食下豆腐」，拿妳樣貌、身材黎開玩笑，過左火位都唔知死，呢類「毒舌」晌香港較多，但係韓國男人絕少「食豆腐」，私底下點講妳係佢地嘅事，但「兜口兜面」開咸濕玩笑真係好少，始終韓國社會風氣比香港保守得多。

好啦，打完咁多字，又係時間準備晚餐等我個泡菜老公放工返黎有飯食，不過最後一句，愛情無分國籍嘅，如果覺得韓國男人有嘅特質就係你所需要嘅，即管放膽去馬啦！！