話說尋晚iPhone 6發佈，除咗講新機之外，最大一個新聞應該就係今次首賣，竟然都無大陸份，重要連內地大電訊商都要連夜將預訂網站移除，仲激到一班大陸憤青點解大陸無分，重話買iPhone就唔愛國，究竟發生咩事？

而網上傳聞好多就話，會唔會同上星期大陸網民係咁爆料、以及電訊商無視保密條款、私自提早公開預訂網站，所以Apple就取消大陸個首發。不過有內地傳媒就指，其實好有可能係內地政府自己出手，唔肯批個入網許可證俾iPhone 6。

事關大陸本來就想搞自己一套嘅4G LTE網絡制式，咁如果全球最大手機廠都唔賣帳，又點樣可以推得到？所以大陸再一次使出飄移龍門，要iPhone 6支援到內地制式、先再考慮批個入網證俾佢。

不過依家傳就咁傳，可能到時一個唔該大陸又會無條件批個入網證俾iPhone 6，但係到時華強北早就入咗一堆香港水貨機上去，重使等你批個證咩。