人氣日本動漫《妖怪手錶》風靡港日台三地，其中主角景太要召喚妖怪朋友出來幫手時，都會把妖怪徽章，插入手上嘅妖怪手錶再講出對白「出來喇，我嘅妖怪朋友！Set On！」，然後就會召喚出妖怪朋友地縛喵。日本人創意多多，有日本農業公司就以手錶發明咗一款便當手錶，仲喺Youtube出咗條宣傳片添。
日本人生活緊張，工作壓力又大，好容易就會食無定時，令到胃部唔舒服，所以日本農業公司就發明出依款便當手錶。從外型睇落，手錶就同一隻真手錶一樣，不過就無咗指針同零件，而係加入餸菜同飯；喺Youtube上面的宣傳片仲見到，菜係由美容外科醫生用手術刀切，再交由中華料理嘅大廚烹調，最後就由微縮模型手作家逐樣砌入隻錶度。
有飯盒又點可以無筷子呢？便當手錶就好似特務007嘅新奇武器咁，只要拍一下錶嘅側邊兩粒掣，就會彈出一對可以伸縮嘅筷子！到時唔理你幾忙都好，只要舉起隻手，大叫一聲便當手錶！Set On！咁就可以食飯㗎啦。
來源：eater.com
