【我撐棚仔】買布買窗簾．深水埗最有人情味的地方

家中窗簾8年沒有換過，忍無可忍，懶仁不能再懶。從前光顧鬼國窗簾城，今時今日當然要支持本土小店。

上個月，走到屹立深水埗38年的「棚仔」買窗簾。

阿太問:「邊個棚仔，係咪之前晨光第一線個彭仔介紹你？」，SY聽到又問:「爸爸你又話買窗簾，點解要搵棚仔？」

其實，連棚仔最資深的東叔也不知道名字的來源，「1979年我由汝州街被搬嚟，頭2年都無人咁叫，因為根本無人嚟幫襯...…後尾愈來愈多學生嚟買布，佢哋叫叫下， 就變咗做『棚仔』囉～」

東叔好好人，他見SY走來走去也沒有投訴，還問:「小朋友你幾多歲呀？伯伯今年82歲啦」，SY很驚訝，因為連我也估東叔只有65歲。

身壯力健的東叔靠一雙手賣布養大四名子女， 他說:「我依家賣布只係為每年參加苗圃行動籌款嘅經費，我參加咗20年，可以幫到啲山區小朋友。」

每日開檔前一定練跑的東叔，因為希望可以鍛鍊體力，東叔:「我想年年都繼續參加，因為每次都可以幫到二百幾個學生有書讀。」

我希望東叔身體健康，心想事成。

SY攪完東叔的算盤， 又對有50年的「何正岐利」單臂較剪感興趣， 東叔:「當年何正岐利好出名，你咁後生實無聽過啦。」

今次很高興，得到何老闆幫我揀布、何太幫我車窗簾，何太:「因為近排比較忙，所以要差唔多一個禮拜，OK？」(無問題，我8年都係咁捱啦。)

何老闆是少有二代同堂， 在「棚仔」家庭式經營。兒子發仔前年畢業，知道爸爸辛苦就來棚仔幫手，非常孝順。

何老闆:「老實說，棚仔一定賺唔到大錢，但賺份人工囉...…後生仔邊學邊搵工啦。」(梗係幫老豆手好啦，打工仲麻煩。)

(你同何太都係棚仔識架？) 何生笑笑口:「唔係喎！！ 30年前，隔離檔請助手，我咪介紹佢入嚟囉」。

何太:「我以前哥哥都係做棚仔，不過後尾佢有家庭就無做，賣布好難維生。」

發仔話頭醒尾，不過何老闆就講反話:「佢都算有心機，好努力。不過依家啲年青人，無得同我當年比，一啲都唔捱得。」

老闆一邊掃地一邊說說:「30年前， 啱啱大陸落嚟，衫都無一件，可以係『棚仔』賣布。嘩！不知幾高興， 嗰時間唔中要留係度過夜㗎！」

(捱夜好辛苦喎)， 何老闆:「唔辛苦，我咪同隔離檔D後生仔， 聽收音機、傾計囉(飲啤酒， 食花生？)。嗰時好窮，邊有錢買野食，飲水咋。但乜都傾，諗返都開心。」

(依家仲有無同當時啲朋友聚下？) 何老闆:「間唔中啦，全部都走晒，得返我留係度。賣布好艱難，不過自由同開心。」

有發仔繼承就更加開心！

SY問我:「點解咁多字貼係周圍？」我答:「因為政府要拆咗棚仔，大家唔想，想保存佢，所以就留低支持字句。」

我希望一切照舊，這個充滿人情味、歷史意義的小天堂，絶對要保留下來！！「棚仔」我撐你！！ 

PS:多謝東叔， 何生， 何太接受我訪問。

大仁生活