新春新解「政治中立」－大小郭沫若，點到你唔服？（羅依）

羅剎毛子能人所不能，徒手擊退熊羆，赤身暢游冰河，號稱「戰鬥民族」。不過論起膽量，還數香港人冠絕全球──由聖彼得堡到海參崴，俄羅斯總統普京嘅壞話，似乎銷聲匿跡，皆因佢拳頭夠硬。反觀香港特別行政區所有被民建聯立法會議員譚耀宗代表嘅市民，上至耆老，下至婦孺，人人賈勇、個個爭先，無懼「亂民」尋仇，敢於譴責「暴力」，筆者實在自嘆弗如。且說丙申大年初一旺角街頭「暴亂」，「暴民」武功高強，傷及八十餘員警，自傷不過三十幾，直追一九八九年天安門慘案──據時任國務院發言人袁木所言，當年「暴徒」傷二千，換來解放軍官兵傷五千。皇天后土有知，六四英烈在上，某一介懦夫，素來怕事，惟恐禍從口出，只好敢怒不敢言，暗自佩服各位「反暴力」勇士天不怕地不怕嘅大無畏精神，並為之嘖嘖稱奇。

問一眾自命「冇政治立場」，「政治好污糟」、「唔好將件事政治化」掛喺嘴邊嘅「普通市民」，何以每次都百發百中、眾口一詞，總有道理「支持特區政府依法施政」？眾說紛紜，有「西瓜效應」一說，有「犬儒主義」一說；有「平庸之惡」一說，有「奴性人格」一說，不贅。以上任何一種力量，一旦主宰一個人，其人必然奉行「中國邏輯」，腦袋聽屁股指揮；凡事先下結論，再搵證據，龍門搬個不停，立於不敗之地。既然「你永遠都無法叫醒一個裝睡的人」，咁佢夢囈到你投降為止，自然勝券在握。少年，你太年輕了，你以為佢真係「政治冷感」？其實佢遠比你更懂政治。「狼性」三要，嗅覺排行第一。

惟唐君毅先生有云：「當你同人接近時，莫有十分確切的證據，你不要想他也許有不好的動機，這不僅因為你誤會而誣枉人，你將犯莫大的罪過；你必是常常希望看見他人之善，你將先從好的角度去看人。」我寧願相信，香港警察及其擁躉，從二○一四年九月二十八日至今種種行狀，始終恪守「政治中立」原則，並無惡意。警方對反賊施以「適當暴力」（政務司司長林鄭月娥語），固然不遺餘力；成王敗寇，如果雨傘革命成功，學民思潮黃之鋒、學聯周永康黃袍加身，共和行政治港，任命工黨郭紹傑為新任警務處處長，並留用前朝警務人員，筆者保證佢哋亦會一如既往盡忠職守，使出渾身解數為「雙學」剷除異己──只要臨時政府唔似亞洲電視，準時出糧。屆時，香港地勢必馬照跑、舞照跳、股照炒、暴力照嚴厲譴責──不過此暴力不同彼「暴力」，係解放軍屠殺北京市民、共產黨鎮壓各地學生嗰啲暴力。

此即中國特色「政治中立」──桀犬吠堯，各為其主。有一條狗，狗主係大賊盜跖；見聖人唐堯經過，吠個不停。豈關堯帝唔夠賢明，無法讓愛與和平嘅力量穿透坦克車裝甲，感動一切有情眾生？「狗固吠非其主也。」理所當然，早於二千幾年前載入《戰國策》，古人視為常識。春秋之世，晉國出過一位寺人名披，又叫勃鞮，兩度奉君命追殺獻公之子、惠公兄長，流亡在外嘅公子重耳。第一次，割斷重耳衣袖；第二次，惠公限勃鞮三日內趕赴重耳身在嘅翟國，勃鞮兩日就殺到。後來重耳得岳父秦穆公撐腰，回國登大寶，是為晉文公；《東周列國志》寫勃鞮棄暗投明，文公記仇，逗得勃鞮大笑道：「主公在外奔走十九年，世情尚未熟透耶？先君獻公，與君父子；惠公則君之弟也。父仇其子、弟仇其兄，況勃鞮乎？勃鞮小臣，此時惟知有獻、惠，安知有君哉？昔管仲為公子糾射（齊）桓公中其鉤，桓公用之，遂伯天下；如君所見，將修射鉤之怨，而失盟主之業矣。」勃鞮生於今時今日，唔入宮做「寺人」，改為投考警察，必定勝任有餘而不失「政治中立」。可見港人苛責防暴隊稱職，有如晉文公幼稚──妄想肉麻言行可以感化執法人員，則比晉文公更幼稚。如果公子重耳於蒲地與寺人勃鞮狹路相逢，不但唔逃走，反而伸出友誼之手為對方打傘、遮風擋雨；恐怕勃鞮當時斬獲一隻衫袖之餘，刀下更添一顆頭顱。「晉文公」呢個名號未曾誕生，就消逝於歷史長河之中。

是故判斷一個人是否「政治中立」，如人飲鉛，要「一生拉勻計」，不爭朝夕；一名三姓家奴「君子豹變」，前三十年臣事英國，後三十年投靠共產黨，餘生奉獻新政權，一視同仁有奶便是娘，從不厚此薄彼留戀任何一位故主，不亦「政治中立」乎？回顧南宋末年，文天祥寧死不為忽必烈所用，顯然偏袒趙氏、「歧視」蒙古人；即使「留取丹心照汗青」，又如何？有欠「政治中立」。文丞相為人正氣，仁至義盡，史筆下如此人有幾？個別事件。「政治中立」，繼而政治正確，方為常態。管仲相齊，桓公稱霸；漢用陳平計，高帝得天下；唐太宗不讓魏徵、李靖、徐世勣，開創貞觀之治……不勝枚舉。不過上述古人，全憑真才實學出頭，毋須巧言佞色搵食；犯顏直諫居多，甚少阿意曲從──所以人家係風流人物，特區啲所謂「社會賢達」則下流賤格，不可同日而語。

至於今人之「政治中立」，借問史書誰得似？應似文豪郭沫若。文化大革命期間，有一首題為《獻給在座的江青同志》嘅新詩，其詞曰：「親愛的江青同志／你是我們學習的好榜樣／你善於活學活用戰無不勝的毛澤東思想／你奮不顧身地在文化戰線上陷陣衝鋒／使中國舞台充滿了工農兵的英雄形象／我們要使世界舞台也充滿工農兵的英雄形象。」一九七七年十月廿一號，北京一百五十萬軍民遊行慶祝以江青為首嘅四人幫倒台當日，又寫就一首《水調歌頭．粉碎四人幫》，節錄如下：「大快人心事，揪出四人幫！政治流氓文痞、狗頭軍師張；還有精生白骨，自比則天武后──鐵帚掃而光。篡黨奪權者，一枕夢黃梁；野心大、陰謀毒、詭計狂，真是罪該萬死！」遣詞用句之狠毒潑辣，不下港人講地、香港培青社、幫港出聲、《時聞香港》及其讀者咒罵時下「廢青」。以上一詩一詞、一褒一貶，其實出自同一位作者手筆，正是蘇聯列寧和平獎得主，時任中國文聯主席郭沫若大師。

各位「暴民」欲得「主流民意」讚美你哋，如郭沫若歌頌江青？只有一道不二法門──掌權。丙申「暴亂」與六七暴動，天淵之別，在於左派暴徒嘅主子中國共產黨入主咗香港，而旺角「暴徒」則無權無勢；因此，任「鬥委會」殺人、燒車、搶警槍、放炸彈，無惡不作怙惡不悛，其主任楊光依然搖身一變「大紫荊勳賢」招搖過市，以表揚佢「畢生為香港作出重大貢獻」。王晶導演提醒大家：「去年佔領後夠有人話杯葛我，結果我的賭城風雲２過年依然華語片票房第一。今年你班友已失勢，仲想玩呢Ｄ？你食屎易過啦！」狗口長出象牙與否，視乎你得勢或失勢──中國人社會裡，你失勢，你食屎易過；你得勢，狗食屎易過。

生命誠可貴，各位後生仔女實在不必亦無法趕及自己名成利就以前，討好城中任何一個大大小小嘅郭沫若，淘神費力、徒勞無功。魯迅先生「橫眉冷對千夫指，俯首甘為孺子牛」，《狂人日記》、《阿Ｑ正傳》、《孔乙己》等多種著作傳世，立德立言而不朽；轉眼八十年，昔日謗佢、欺佢、辱佢、笑佢、輕佢、賤佢、惡佢、騙佢嘅虫豸們，而今安在哉？正是：「爾曹身與名俱滅，不廢江河萬古流。」「小鳳姐」徐小鳳勉勵張崇基、張崇德兄弟，嘗言：「無論你做咩都有人唔鍾意你，所以你做好本分為鍾意你嘅朋友唱歌就得。」《禮記》有云：「來而不往，亦非禮也。」特區政府既然「爆竹一聲除舊歲」，鳴放「合法」槍火取代違禁炮仗；「總把新桃換舊符」，大紅橫幅印上恐嚇字句，而非新年祝福；廣大市民亦宜禮尚往來，高歌一曲「旁人常在笑我堅持／我只得堅持／我喜歡堅持」，擇善固執，回敬北方一套所謂「主旋律」、「時代最強音」。

是歲丙申，謹此以孔廟門前「四不猴」起興，祝願本港各位郭沫若徒子徒孫，來年繼續「非禮勿視」，民間疾苦眼不見為乾淨，人饑己不饑，人溺己不溺；「非禮勿聽」，無論「反對派」幾大聲、「刁民」幾無禮貌，吶喊響徹鐵屋，一律充耳不聞，安枕無憂；「非禮勿言」，茶餘飯後話題遠離政治濁水，以保持口腔清潔，金口只為嚴厲譴責粗言穢語或「暴力」破例；「非禮勿動」，身體老老實實，用腳支持梁班子「依法」施政，打消移民念頭，燒毀外國護照──生生世世，做個勇敢中國人是荷。

作者：羅依（本文章由聚言時報授權提供）