周秀娜鄭伊健宣傳電影《我的極品女神》王晶變身「喬布晶」

周秀娜及鄭伊健今日齊齊在北京出席3月上畫電影《我的極品女神》發布會，發布會名稱為「iGirl新品發布會」，擺明玩Apple產品發布會概念，監製王晶變身「喬布晶」，介紹iGirl周秀娜出場，鄭伊健就以全球首位用家身份，上台又攬又抱，體驗這個「機械人女僕」產品。

電影由愛奇藝影業和星王朝有限公司聯合出品，號稱「史上陣容最強網絡大電影」。發布會上，「喬布晶」介紹過iGirl這款人工智能機器人女友後，娜姐以「001號機械人」從一個盒子中現身。王晶於會上笑稱電影導演不好當，只好藉助科技轉型產品經理，希望藉這款產品提升現代人的幸福感。

王晶介紹娜姐這個機械人在片中有三種使用模式，包括「家政」、「女俠」和「親密」，笑稱係「男人的未來」，更請了電影中男主角鄭伊健上台親身體驗。當伊健啟動了「女俠」模式後，即以娜姐作擋箭牌，避開司儀追逼；再啟動「親熱」模式後，就當眾與娜姐呈現各種抱抱動作，包括伊健自言最喜歡的《鐵達尼號》「You jump I jump」從後抱腰。

娜姐接受訪問時表示，電影上年拍完，估唔到一直到今日咁凍嘅情況下至見番伊健：「真係寧舍溫暖，我哋仲諗住今晚同全部工作人員一齊食火鍋，夠曬暖笠笠。」娜姐仲大讚伊健係極品情人，份人長情又細心肯幫人，完全諗唔到有咩缺點。她說：「我覺得身邊嘅另一半除咗愛你同對你好之外，令你放心都係一個好大嘅優點，我相信伊健已經做到，我都希望將來自己可以識到個令我放心又錫我又有安全感嘅男朋友，不過最好要有伊健咁靚仔喎。」

故事大綱:

男人一生，只為尋找一個完美情人……
如果係個機械人，又得唔得？

失戀不離三兄弟嘅曉峰(鄭伊健 飾)、尊尼(何浩文 飾)同朱雲(林子聰 飾)，齊齊被3個港女女友怒飛，有晚曉峰飲大咗，網購咗又索又「愛回家做…家務」嘅iGirl機械女友001(周秀娜 飾)返嚟。尊尼同朱雲跟買啦，就買咗都正嘅002(文凱玲 飾)，同仲正嘅003(鄭欣宜 飾)返嚟。

曉峰先入為主，覺得記憶體唔同真正回憶，就算001係一個如何體貼嘅女人，佢始終不能有人類感情，所以即使001服侍周到，曉峰都若即若離。直至有次001瞓身救佢，曉峰先知原來自己早已對001有feel。曉峰教識001做人GF嘅道理，尊尼同朱雲仲有樣學樣，輔導埋002同003……

以為大團圓結局之際，3個港女前度因愛成恨，返嚟K.O. 3個 iGirl女友……