【概念店】7-11都走木系文青路線？食盡車仔麵、軟雪糕，好味啊！

SY:「爸爸！又話帶我嚟食雪糕？依度飲咖啡㗎喎」我話:「咩呀！7-11喎， 唔一定係飲咖啡嘅！」

阿囝:「咦…...真係7-11喎， 我仲以為你上次去飲咖啡...…呢！！綠色嗰間呢...…點解E間7-11唔同咗顏色嘅？」

對！ 7-11走木系文青路線， 金鐘新開第一間概念店， 八卦仁當然要去八一八， 所以今日帶SY去逛一逛， 嘆個下午茶。

未到金鐘前， 同事問:「7仔間概念店話有麵食， 其實係咪專人幫你淥個杯麵， 加條腸同魚蛋呀？」

老實講， 我最初都這樣諗...…不過， 原來真的有一個如同車仔麵檔的廚房，而且較關東煮更多選擇的餸菜。 (Total 24款餸㗎有)

我問大廚有甚麼推介， 他說:「水晶粉配冬陰功啦！！ (因為阿囝不能辣，所以改了蕃茄湯)泰式香茅魚餅、溫泉玉子、你一定要試香辣肉丸超大粒，少少辣，超正！」

估不到堂食也將湯、麵分開盛載，外賣來說很不錯，但環保仁下次會叫師傅放在一齊，可以用少一個膠碗喎。

蕃茄湯超濃，微微酸，如果不是為了SY，應該配個冬陰功會更好味。(我都係犯賤，不能太健康啦！)

不過健康蕃茄湯伴香辣大肉丸就一流，辣辣地酸酸地，醒腦醒神，爽腦繼續衝！

可惜不能辣的小朋友，只是咬了半口，已經大叫救命...…

「水...水...水…爸爸！你又搵我笨。」 (我:車！ 我都食到，點知你咁水皮)

Noodle Bar ~ 4款粉麵 ($28) /24款餸 ($5-$10)

SY愛食腸粉， 我又愛黑松露， 於是就來一個黑松露腸粉連飲品($25)

腸粉夠熱！！ 不過SY食了兩條就走了上天橋玩…...(乜黑松露可以突然增強體力咩？ )

不過，走上橋後，小朋友又大叫我上去， 他說:「好高，好驚，望到條馬路，點解個牆起得咁矮...…都似快D陪我返入去」

哈哈！！ 原來細膽都有好處喎， 起碼我知下次想小朋友乖乖坐定定， 揀去高層位置的食肆就得啦...…

Yeah！大地在我腳下，真好！！

之後便是小朋友最最最期待雪糕時間，店員推介:「不如試吓我哋新出嘅Brownies，同 Cappuccino雪糕吖 ($35)」

我最愛新東西， 兩款玩冰火的3.5雪糕...…正吖！

自己雪糕， 當然是自己淋Cappuccino啦！！ 本來有人要跟我爭，於是我出殺手鐗:「你想食咖啡味，定朱古力蛋糕雪糕？」

一出朱古力三個字， 即時可以控制這位勁扭計的大帝...…哈哈！！ 還是乖乖的看我倒Cappuccino。

很久很久沒有再在7-11看到店員拉雪糕...…究竟是不是全港所有7-11再也沒有軟雪糕賣呢？

暖笠笠的Brownie放在杯底， 在15度的黃昏， 忽然溫暖， 忽然覺得今日很滿足...…真的「心裡有熱情， 這裡有共鳴...」

Brownie軟雪糕好食過Cappuccino。不過，我其實看中雪糕仔、雪糕妹多一些...…可不可以用印花加錢換呀？

因為這裡是一個半圓形的設計 阿囝食完雪糕後非常興奮，不停穿梭前門及後門。

我:「你走夠未呀？」 SY:「我跑緊馬拉松喎！！」

有太陽伯伯的時候，應該坐露天位置，不過今日毛毛雨，坐店內一樣有好處...…

(講真！好似好衰)， 一邊食麵是不是可以試睇壹仔、新假期呢？？

最後， 我們買多一個朱古力牛角酥做早餐。麵包夠鬆，而且內餡有滿滿朱古力，如果夾到新鮮出爐，即食一定更正！！不過今朝叮熱食都不錯。

7-Eleven概念店
地址： 金鐘力寶中心
營業時間：星期一至五 07:00-21:00、星期六 07:00-17:00、星期日及公眾假期 休息


大仁生活