【快啲食啦～凍晒喇！】童年味道之媽媽靚湯

「快啲食啦！！凍晒仲邊好食呀，你仲要換公仔影架？」Dreamix廚負責人之一Sindy，望著不停影相的我說. 忽然我腦海閃過媽媽很Warm的依依哦哦。

從沒想過在觀塘「大盛」樓上， (劣食料理好得人驚)，有間如此一間非常「家」，非常健康，非常環保的的溫暖私房菜存在。

「Dreamix廚」由King負責廚房，Sindy則主打湯水及甜品的家庭式私房菜，播著真貼題的「愛‧回家」，原來是大廚King落場時重溫的。

Sindy:「佢好鍾意睇㗎。」(唔怪得依度咁有誰家灶頭FEEL啦)

因為我知道今日飲菜乾豬肚湯，所以前一日就留位。一邊用隔油壺幫我盛湯的Sindy:「個湯我今朝7點就煲架啦，你睇下得唔得。」

呷一口豬肺湯，登時湧出30年前在伯娘家喝湯的味道，「潤， 清， 滑， 甜」，好飲到要即時添多一碗的菜乾豬肺湯。

Sindy:「我係一名70後，當年屋企好注重煲湯，日日都煲菜乾、西洋菜、蕃茄薯仔，不過依家啲菜無味嘅，你覺唔覺得？但係我都想多D人可以飲到湯...…(拍檔大叫: 幾時煲章魚蓮藕呀？)得啦！ 知道啦...…下個禮拜啦」

(這裡的員工福利真係正...…我都想嚟做) 

本來在新界東北經營農場的她們，因為政府發展被迫要另謀出路，於是便在觀塘辦私房菜。

Sindy:「我哋係成業街做咗年幾，啲客成日投訴個單位太細，訂唔到位，於是兩個月前就搬嚟依度囉。」

今日好好彩，原來蝴蝶腩好難食到，Sindy解釋:「豬肉、蝴蝶腩一定要訂，因為街市唔係成日有靚嘅…...」. 

蘿蔔炆豬肉，入口直情較牛腩更腍，肉質超超超嫩！心諗:「豬腩咁鬼好食嘅咩，又滑，D筋又唔肥，真係食遲咗幾十年好嘢！」

蓮藕餅煎得香噴噴，碎粒爽脆，我絶對有理由相信，跟小學時湊我的「滿姐」手勢一模一樣。

咬一口肉餅， 從前等齊人，規定要關電視才食飯， 最後一定要乖乖食畢全碗飯才可以離開飯枱的情景，瞬間重現腦海，真回憶就是這種味道。

Dreamix廚每日有4款午餐：2款肉、1款素、1款粗糧餐。

Sindy:「幫助腸道蠕動，一個星期食一次粗糧餐最好」不過，雜食仁今日沒有揀健康餐。(我係咪好唔健康？)

Sindy答:「我叫你一星期一次，咁你嚟多幾次咪得囉」 (又係喎！)

(係咪午市/晚市都要訂位呀？)Sindy:「晚市一定要呀，午市就我會煮大約30個餐，留咗位就一定有，如果唔係可能一點之後嚟都無晒。」

這裡的靚湯、愛心涼茶、白飯全部都可以加配！

Sindy:「通常有多就一定可以添，但D湯同飯好多時添一次，都好快無晒囉...…不過饅頭就要即蒸，所以有時添唔到」

(哎呀！你有煉奶，我真係可以食10個呀！)

套餐有飯後果， 雖然只是三瓣新奇士，但齊齊整整預先去皮、掉衣..….這真的是當年爸爸幫我將橙去皮，「叫」我食生果的似層相識手技。

雞骨草雪梨茶，絶對是因為吃完煎炸食物，Sindy為我們而設:「你飲晒我再添比你啦！！」

我問:「你最拿手係煲湯定係涼茶？」她的同事大叫:「佢最叻整甜品，椰汁糕，我哋都等緊。」 

之後這裡還有手工皂、利是封、酵素清潔濟等等的工作坊...…

King說:「D清潔劑係我太太做嘅， 用嚟同我囡囡間學校籌款，我煮完嘅瓜、生果皮就放埋一邊，發酵三個月就畀太太做清潔劑囉。」

(下次有機會我都要嚟學吓嘢先得！) 

地址:觀塘觀塘道404號時運工業大廈11樓E室

午市: $58-$68
晚市: $350一位

大仁生活