毛記電視分獎典禮好睇，好睇在佢地好用心去做好（凋零）

（圖片來源：明報）

改歌緊貼時事兼到肉抵死，搵人演繹又揀得好，繁忙兒童合唱團竟然真係搵班細路，仲要扮喪屍同劉華、小鳳姐竟然黎現場睇仲要全場合唱喜氣洋洋、河國榮作為香港一份子壓軸唱首關於香港既歌，高潮位一個接一個……同時，你見到班主播好比心機去做，黃慘盈既港女，dickson既毒(仲要比人真打左一巴)，然後最尾盤菜喊到眼到腫埋，連東方昇都眼濕濕時，你feel到佢地好落力，係真係會睇得投入。

其實成個分獎禮有D似叱吒既模式，不過癲好多。我好鍾意睇癲既製作，例如卡通片《晴天pigpig》同大台膠劇《老表你好hea》，一班人認真咁去做D痴線野果種強烈落差引發既喜感真係好正，100毛班人絕對係近期既表表者。Off topic一句，我覺得香港而家唔夠多會去認真堅持去做癲野既人，好似《十年》入面自焚者同抗爭者咁。

今晚個分獎典禮創造左好多歷史，例如：
電視界－以前得《頭條新聞》改歌諷刺時弊，仲要好少人特登追睇，而家由now播，個個因為撲唔到飛而追睇，收視可能第一次好過大台！證明舊果套慢慢都會收皮。

廣告界－Shell 同now今晚賺到既印象，尤其係 #多謝Shell 呢個hashtag，班marketing真係開心到訓著都笑醒。

文化界－改歌都可以搞頒獎禮，仲要請曬一個個你熟悉而本來唔係唱歌既人物(河國榮、方健儀、鵬哥)，完全係新既文化

仲有，可能係我over-interpret，但我覺得最尾仲提升左少少香港人既歸屬感，我對production放《真。香港地》呢隻歌壓軸真心感動，承接到雨傘革命、撐香港隊以來既團結心，聽完隻歌有D大嗌We are HONG KONG既衝動 !

P.S. 然後，我好慶幸自己之前follow左唔少真。KOL，多得佢地既記憶力同埋不隨波逐流，係睇完河國榮唱《真。香港地》完滿結束下年見之後，佢地既Status會提番我MC仁有份填陳冠希首奶共歌《東方快車》、何韻詩有份既文化監暴從來對政權暴力真係得個監字、俞琤之前炒大班毓民、Shell之前係北極熊隔離開鑽油台、改歌笑鳩政府其實同快樂抗爭無異等等。一巴巴升落我塊面果種衝擊，真係要沖個涼清醒下。

作者：凋零（本文章由聚言時報授權提供）