絕對禁忌：師生戀（毛言地）

（圖片來源：輔仁媒體）

我支持自由戀愛，我都認同愛情非常重要，但喺某啲情況下並唔可以單單因為一個愛字就可以跨越一切，而師生戀就屬於其中一樣。
　　
學生同老師當中嘅道德界線比起任何關係都更加明顯，更何況個教師仲已經係一個成家立室，仔都有埋嘅男人？依段關係無論有幾多愛喺入面都好，佢嘅存在係依個社會上無法容忍。理論上為人師表就應該係傳授知識比下一代等佢地有能力上大學或者準備好進入社會，而唔係「以身作則」咁比一個完全錯誤嘅價值觀比學生。如果學生咁樣親近老師喺有目的嘅（我都信今次條女唔係善男信女），好明顯今次會令佢覺得「係WORK嘅」，而日後出到黎做嘢都好自然會利用肉體關係去得到利益；如果學生真喺純粹鍾意左個老師，咁個老師就係親手摧毀咗一個女學生純真嘅愛情觀念，令佢覺得愛情喺不可相信，長遠亦會扭曲左個學生妹對男人，對一段關係嘅睇法。
　　
老師同學生可以亦師亦友，但依個同樣喺師生之間理應最盡頭嘅關係。我用番大人嘅口吻去講，就當個學生妹唔懂事，但做得副校長果個男人係咪應該有基本是非判斷能力？自己有老婆仔女，就算覺得有性需要而老婆滿足唔到你都好，有良知嘅人點會去搞一個自己嘅學生？咁樣比一個上司用權力去引誘一個女下屬同佢上床更加可怕。大家都會當學校係面對社會殘酷前，最後一個比學生快樂成長嘅地方，但依位副校所做嘅一切比唔到半點身為教育界人士應有嘅理性同道德我睇，喺我眼中佢只係一個當學校係一樓一，然後揀一個最啱自己口味嘅學生妹再滿足自己獸性嘅敗類。睇返佢地嘅對話，個男人根本冇半點後悔，佢只係怕比人爆大獲之後冇左份工、冇左頭家、同埋冇咗依個後生嘅性伴侶，我覺得叫佢做「男人之恥」絕不為過。
　　
學校係一個好重著規矩嘅地方，我記得我中學果陣男仔頭髮唔可以過眼眉，女仔條裙要長到膝頭再落。連咁小事都執到正嘅學校，一個理應喺學生面前建立威信嘅老師，根本就唔應該比師生戀依一件事發生喺發生。問心果句個老師唔知佢地一定冇將來咩？我相信依個男人一定唔會為左一個女學生放棄一切，因為佢人生得一次，但學生妹就年年都會有新。就算我唔講依件事，就算個老師唔係男人都好，一個有知識有教養嘅成年人為左自己一時快感而影響到一個學生嘅人生同生活都係一個人盡可夫嘅行為。師生戀係一樣百害而無一利嘅關係，我請求咁多位身為人師嘅成年人，你有性需要我寧願你叫雞，有咩事你最多都係冇左份工，但你起碼唔會搞到連個學生都要同你一齊陪葬。

作者：毛言地（本文章由聚言時報授權提供）