有咩好得過一日一杯靚咖啡，提神醒腦，返到公司一杯落肚立即回魂。不過原來咖啡都有好多秘訣，學識一兩個都夠你終身受用。今次筆者就搵來當中四個小秘方，等大家以後開工都可以嘆到靚咖啡。

1.飲剩唔好倒 雪著做Ice Latte

好多時沖咖啡，都唔知點解硬係會沖多咗，唔少人就會選擇倒落昇盤咁折墮。不過大家只要將佢倒落雪櫃個製冰格、第二朝返去將雪好嘅「咖啡冰」放落杯，再加牛奶你就會有Ice Latte喇。

2.太苦咪落糖 加鹽重好飲

有啲人類總是要犯同樣的錯，又要學人飲齋啡、但又嫌佢苦過頭。好多人都會係呢個時候，選擇落糖去中和下。但其實想要保持原味，其實只要加小小鹽落去就得，因為佢可以阻擋你舌上味蕾對苦味感覺，但個味又唔會好似糖一樣咁出。


3.唔想飲齋啡 自製口味無難度

假如你係好有生活情趣，日日都自己去磨咖啡豆的話，就不妨係你磨豆之前，加其他嘢落去一齊磨。例如肉桂枝、碎橙皮、磨完出來你就會有一杯有著個人口味嘅咖啡，試完真係返唔到轉頭！點都好過剩係得糖同奶先，你話係咪？

4.一個玻璃罐 Milk foam不求人

講開沖Latte，有無發覺自己沖硬係差小小嘢？就係差啲泡喇！雖然話有錢自己買部貴小小嘅機都得，但以下呢個方法只要你有個玻璃罐同微波爐，兩分鐘就可以自己打得到。

前先你將個玻璃罐（一般果醬個種size）倒滿2/3奶，然後扭實個蓋搖佢30秒，之後再放入微波爐叮多30秒。之後先倒奶落杯咖啡度，再倒剩低啲泡落杯面，咁就有一杯又熱又有泡嘅Latte喇！（不過要小心，個罐有機會變得好熱）