【文青傢私舖】有氣質姆明‧Miffy‧小王子‧仲有骷髏頭梳化

上星期， 我們玩完【落住雪溜冰】之後， 走過旁邊， 有一間很文青， 很有格的店， 我對阿太說:「E間嘢， 我哋上次嚟好似唔見有？」

HOMELESS的店員剛剛聽到， 輕聲答我:「係呀！我哋新開架， 11月中先開...」(好尷尬...點解佢會聽到我講嘢？？)， 阿太：「你講嘢好似拆天咁大聲， 係人都聽到啦」(車)

有少少非主流Feel的生活家品， 雖然我不是潮仁， 但無無聊就走入去逛一逛， 可能有好發現...

店員話設計師本來想送一份玻璃禮物給朋友結婚用， 但想來想去也想不到， 最後便嘗試將玻璃切一半放入電燈膽。

SY拿起上半截玻璃：「嘩！爸爸， 好重呀！」， 我好緊張:「小心！ 小心！玻璃嚟架， （SY：佢好似一個冰，爸爸，點解要擺個燈係入面？）， 靚D掛，（SY:點解靚D呢？）」 （如果我識， 我就係藝術家啦）

行到另一邊， 我見到一黑一白熊仔， 我最初以為是鹽， 糖盅， 不過百厭的SY， 用力拉開白熊....

呵！！ 原來不是放胡椒粉， 放鹽， 而是鏍絲批， 真的沒有可能聯想得到。

全店最吸引我一定是這個骷髏頭梳化， 好有鬼屋Feel， 上顎當椅背， 坐在他的舌頭上， 過癮！！ 不過＄3750就要先儲一儲錢先再考慮...

轉頭SY大叫:「E隻狗仔好得意， 仲有隻腳」， 我望一下：「雀仔呀？？ 不過你帶住個大眼仔都好得意吖」

上次沒有與姆明集郵的SY， 一發現姆明杯杯碟碟便說:「咁多姆明喎， 我鍾意E隻杯， 因為有齊4隻姆明， 好靚呀！ （我：你真係記得佢哋？）， 點會唔記得， 上次你去新世紀睇姆明， 唔帶我去我都記得， 我唔開心」（佢真係乜都記得？？）

於是我又要拉開話題：「嘩！你睇咁大個Miffy燈喎...」， 很冷淡的SY：「咁又點？ （我：有大Miffy， 有細Miffy， 仲有小王子添）， 鍾意Miffy係媽媽， 我鍾意黃色嘅布布， 同比卡超」 

要逗這位小朋友開心， 萬試萬靈的方法， 我氣定神閒：「哦！ 原來你只係鍾意黃色， 我本來仲想過隔離Godiva買杯咖啡色嘅雪糕你食添」...

雙眼由失望變成發光的SY：「朱古力(高八度)...我最最最鍾意， 行啦爸爸， 行啦， 我好心急呀」

PS： 商場二樓位置，有一個超過二十呎高高型紙製「聖誕蛋糕」，資料指是用環保物料製作，活動完結後可循環再用！ （係囉， 我成日都諗完咗展覽之後公仔點處理， 揼咗去都真係幾嘥）

HOMELESS

地址: 太古城中心211號舖

電話: 2110 1984