2015區選曲終人散,大家當然為 treegun 被連根拔起,碌葛博士被拉落台喝采,但係睇深一層嘅結果,可以見到中聯辦操盤嘅能力係有增無減。

可以見到,今次中聯辦重點打擊嘅對象係泛民嘅明星議員。馮檢基一役,完美示範點樣搵變節舊部界票。馮檢基輸 99 票,佢個舊部食咗二百幾票,啱啱好到你唔信。至於何俊仁一役,我唔會話熱血公民係共匪同謀,但係佢哋由始至終得一個目的,就係大事宣揚要民主黨票債票償,既然佢地比較攞得出嚟見人嘅係得鄭松泰,中聯辦仲唔借力打力,盡開選舉機器,消滅何俊仁?

個人認為,中聯辦嘅著眼點,係要令到泛民係下一屆嘅立法會超級區議會組別無人可用。所以除咗馮,何二人,涂謹申所屬嘅選區都係重點對象,最後涂險勝一百票,不過無其他疑似同路人界票,係選民生性,定係中聯辦失策數唔夠票,就不得而知。當然,泛民自己戇鳩都係一大原因,有意出選立法會超級區議會議席嘅公民黨陳家洛,既要空降又唔肯同海怡關注組主席協調,大家攬炒[1] ,中聯辦唔需要做啲乜嘢特別工夫。(泛民嘅戇鳩嘢實在太多,恕不能盡錄。)

今次整體泛民加埋本土嘅議席比上屆多咗,個人認為某程度上共匪係輕敵所致。Treegun 係佢做咗十幾年嘅地頭,比一個最後一分鐘報名嘅不知名人士擊敗,諗深一層,或者只係中聯辦以為勝券在握,選舉機器都懶得開動[2] 。Treegun 所在嘅漁灣邨,住嘅有好多係老一輩嘅水上人,基本上係典型嘅紅色屋邨,你話如果唔係選舉機器冇開動,佢會唔會輸?可以預期,四年之後,即使徐子見做得再好,要再擊敗 Treegun 應該難度甚高。至於沙田區,范國威嘅新同盟攻下唔少議席,當然佢哋喺熱狗同傳統泛民中間搵啱條本土路線做得好好,但係另一個原因,個人認為係中聯辦其實冇乜興趣幫葉劉。葉劉過於託大,以為接收公民力量係沙田嘅盤就攤大手板[3] ,但係佢係政改一役表現差劣,又唔係工聯會咁根正苗紅,根本係舊電池,由得佢自然死亡咪算囉,無謂嘥資源幫佢啲手下數夠票。當然新同盟嘅地區工作同溫和本土路線亦得到被想像中大嘅效果,呢個係值得高興嘅。

喺中聯辦嘅角度睇,今次區選嘅操控目標可以話係僅僅合格,消滅咗泛民幾個老大哥,但係低估咗香港人對梁振英同大陸嘅不滿,被傘兵同新同盟攞到唔少議席,而後生一輩嘅泛民表現亦都比預期中好。下年嘅立法會選舉先係真正戰場,其實今次共匪比起上一屆多咗成十萬票,泛民加埋傘兵,總得票都無多咗咁多[4] ,可以預見下年嘅選舉機器會更加精密有系統。

香港人面對龐大嘅選舉機器同埋每日百計嘅新香港人殖民,可以點算?其實,共匪嘅情報系統唔係完全準確,佢哋今次精心部署打低泛民嘅大佬,其實唔知好多香港人唔妥佢哋好耐,下年立會選舉嘅超區議席,其實搵個乳鴿加埋傘兵嘅效果應該好過仲係馮,何兩人。衰啲講句,後生嘅選民,一定唔會揀 AV 仁,但係會揀年輕本土力量,而老一輩嘅泛民忠實支持者,亦都唔會冇咗何俊仁而唔揀乳鴿。所以係某程度上,今次中聯辦重點打擊泛民巨頭,其實係幫咗本土力量一把。下年會有更加多參與過雨傘運動嘅首投族有資格投票,點樣 mobilise 佢哋去投票,抗衡殖民票,種票,會係非常重要嘅戰場。由上屆立法會選舉劉江華意外墮馬可見,投票率和選區越大(超級區議會議席要控制嘅係幾十萬票),共匪越難操控,所以年輕一輩越多人會投票,應該會越有利。

以上所講,其實都係老生常談,中共嘅殖民絕招,真係好難破解。睇下最受到鉛水事件影響嘅新屋邨,全部都係共匪大勝[5] 。而呢啲屋邨,亦係住得最多新香港人嘅地方,佢哋亦係最容易受到操控嘅一群。所以,香港一日無移民審批權,一日都唔會有好日子過。

注:
[1]: https://dce2015.thestandnews.com/district/southern/#southhorizonseast
[2]:http://hk.apple.nextmedia.com/realtime/news/20151123/54462164
[3]:http://hk.apple.nextmedia.com/realtime/news/20151123/54460312
[4]:http://hk.apple.nextmedia.com/realtime/news/20151123/54458669
[5]:http://hk.apple.nextmedia.com/dc2015/trend/____-316859281135

 

作者:Not of the ilk(本文章由聚言時報授權提供)


 2016,先係真正嘅戰場(Not of the ilk)

 https://www.facebook.com/GaldenPolymer/timeline