Fresh grad，可否醒少少？（占米糕）

我屬於早期80後，我地呢一輩，入讀社會大學都有14，15年了，已經開始進入「老屎忽」階段，同年青人需要時間磨合，係因為我地呢班受過殖民地教育嘅洗禮，某程度上我地比新生青年更有資格講龍獅旗，絕對唔係因為舞枝龍獅旗就夠靚夠威，而係呢枝旗背後有令人感動嘅歷史。80後雖然唔夠上一輩刻苦耐勞，但就一定比90後捱得。前輩的說話與經驗我地會先接受，就算反對都唔會當面駁斥，會用喺大學學過嘅知識嚟分析，啱就改，錯就算，總要留一個下台階俾前輩，馬榮成本「天下」都講過「凡事太盡，緣份勢必早盡」啦。唔係凡事都要據理力爭，識做人，往往比識做野好好多。

而家到我成為半個前輩，但係而家年輕大部份都自以為是，「老屎忽」講乜嘢都唔啱聽，成日話我以前既事，過晒時，係嚿屎。唔好成日懷緬過去常陶醉。我唔夠膽話我食鹽多過佢地食米(可能佢地煲豉油碟多過我)，我工作時拆解nut cases嘅經驗應該多過佢地掛。就算我係公司唔做野，坐到坐得多Ｘ過你。你拜神佢都係坐係度咩都冇做過，你一樣日日供奉佢，尊敬佢。

老屎忽佢地可能係坐係度鳩流流，吹水吹得起成隻諾亞方舟，貌似咩都冇做過，但係間公司日日都供奉佢，上埋神台，事出必有因。你睇我而家都可能喺公司鳩流流好得閒，指個助理寫下code俾我debug，做operator，但係前幾年我都係喺個mon前面做到隻蟹咁噴白泡，到我賺咗一定經驗先可以清閒D，做個小小前線管理層。我嘅要求唔係好高，Appropriate attitude，learn smart同 perform smart就夠，但係新入職嘅90後往往令人失望。

就好似有一日，公司廁所冇水，90後竟然變哂「柯P」，疴完就算，唔沖廁之餘仲有D，唔沖廁之餘仲有滴汁，滴埋落地面，呢D係做人基本公德心都冇，唔講學歷，唔講經驗，你連做人嘅資格都冇。冇廁所水，入面有個水桶俾你裝水沖囉。就算你唔知唔熟架步，你可以問我，我唔會好似你Ｘ老屎忽咁Ｘ你掛，你唔問又唔做，鬼鬼祟祟以為疴完J完冇人知，我一定會Ｘ鳩你，因為個90後嘅心態仲衰過仆街。我真係真心希望佢醒少少，唔好柒下柒下咁番工。

個90後竟然話，我地讀嘅大學D廁所係自動沖廁同埋有外判清潔，因為真係唔好期望佢會次次都記得沖廁，同埋用廁紙執自己手尾呢D咁低級嘅動作。Ｘ你，呢D係叫公德心，90後真係唔多覺有，佢日日Ｘ陳漏波，但係佢漏波就大條道理，點都係我錯，佢仲話廁所冇沖廁水同廁紙就「李暉」添，因為佢係見習程式編寫員，合約冇話包清理廁所，「又話我地讀既大學唔教我地沖廁，因為真係唔期望我地出來日日係到做沖廁既工作。」

第二樣，身為一身肌肉嘅勇武男子，公司水機冇水，而當佢有發達嘅二、三頭肌，係咪要幫下女士或者彎唔到腰嘅老鬼換下水呢？個個竟然見水機冇水就掉頭走，扮冇事發生，呢個時候你嚟講平權，作為男人，個90後不配。唔好同我講「我讀嘅大學冇教我地換水」，算鳩數啦你，我當你都係讀國力算數。

連做人嘅基本公德心都要人教，難怪年青人咁鐘意參加求生訓練，歷奇訓練，冇人教，班fresh grad真係生存唔到。唔好話成日叫你貼信封，我真係驚佢貼漏郵票搞到公司個client俾人追收郵費，好在香港郵政寧願俾審計署鬧都要將欠資信件都會送俾個客，連客人請食飯，table manner都要人教，佢小事都做唔到又做唔好，我點敢top-up佢俾大事你做，更加唔好講一年加幾次人工添啦。

我私底下問過公司裡面幾個老屎忽，佢地異口同聲話個rookie做嘢幾快手，甩漏少D更好，但係呢D應該係性格同經驗問題，可以慢慢教，唯一問題係fresh grad 好多時都唔知進退時又冇禮貌。唔Ｘ識又亂鳩做，自把自為都算，佢肯虛心問，成個office嘅老屎忽都一定會教，當你BB又點話，因為連rookie都識做，做得好，佢地又會多個藉口懶蛇。如果個rookie乜柒都唔識，仲覺得自己係學院派，I born to change the world，佢地係唔會理佢，等佢踩屎，老屎忽們就做花生友拍爛手掌。

人工唔夠就hea做，絕對冇問題，當年政府有個廣告口號俾人改做「我的薪金如何，我的工作態度也必如何啦」，唔稀罕萬零蚊嘅話，倒不如唔好做，啃老，食拖鞋飯，何苦要為萬零蚊出賣自己，賤賣自己，做一個冇尊嚴既打工仔？工字不出頭啵，「你有得揀你都係老闆啦。」工作態度係對自己嘅交代，咁Ｘ樣做野，就唔好再講乜Ｘ野夢想，因為你冇資格接受更高嘅offer，更嚴厲嘅挑戰。人工唔夠就hea做，咁冇錢你一定唔Ｘ做，咁幾多先叫夠人工?有幾多夢想一開始係有錢賺？90後，諗同講就無敵既，真係做到既年青人，一成都冇。其餘九成都係吹神。

我係受人錢財，替人消災，尊重自己嘅職業同職位，唔係冇尊嚴嘅生活，我都會覺得我係underpaid，你想證明你唔只呢個價就係搵過份高人工嘅工，或者自己做老闆。溫室長大嘅年青人當然唔明，一畢業就要買樓買車結婚生仔，又要唔影響自己現有嘅物質生活，呢D想法唔知幾時開始，我真係唔認同一個自己都養唔Ｘ掂既細路仔，仲要學人養車養樓養老婆，我真係好驚終有一日會聽到D餓死老婆瘟臭屋嘅新聞。香港歌嘅歌詞係好，最怕解錯詞，「原諒我這一生不羈放縱愛自由」，唔慌唔係「今天我」囉。

修身治國平天下，你地連自己都未能照顧，講咩政治呢。年青人真係醒少少啦，唔做野都唔好阻住個地球轉，我知你好Ｘ勁，但係呢個世界唔係要一班「好Ｘ勁」，係要一班能夠合作既同事。你好Ｘ勁都唔使話俾人知，我地睇得出架，但係你無料扮四條，我地一樣睇得出。成熟啲，唔係凡事強出頭。英雄主義，係一定會累死年青人。英雄得一個，下面踩住無數個英雄先上到位。醒少少啦。

作者：占米糕（本文章由聚言時報授權提供）