港中大戰：總好過冇嘅三分鐘熱度（小西毒）

兩場港中大戰，令香港足球再次受到香港人關注，對上一次應該係09東亞運動會。

有部分人覺得香港足球發展真係好慘，一方面做左政治議題，一方面多左唔少忽然球迷，口就話支持香港足球，查實就葉公好龍而已；就好似人地用完即棄嘅避孕套咁，高潮過後，又再次比人丟埋一二邊，香港足球發展繼續無望復興。

但係，咁又有咩問題呢？

唔好話香港足球，諗闊D，香港體育及文娛康樂發展，一直都係扶不起嘅亞斗，呢個唔可以剩係歸咎於政府唔做野，而係同成個社會嘅文化同氛圍有關——讀書搵錢至上，外國文化體育往往是最好的。我相信香港足球界，又或者成個文化康樂界，都好清楚呢個殘酷嘅事實，而箇中問題，唔係一時三刻可以解決。其實唔單止香港，全世界都係咁，全球化嘅影響下，大家每日收到嘅資訊實在太多，能夠持續關注嘅亦都實在太少，縮短左大家對事件關注嘅持續性；小至上年嘅ALS冰桶挑戰同四年一度嘅世界盃，大至香港民主發展、歐洲難民問題，唔少話題/議題都係一轉即逝。人嘅三分鐘熱度，人嘅善忘，就係咁可悲。

回歸正傳，正如標題所言，今香港足球因港中大戰而再次受到關注，但熱潮過後，大家再次對香港足球發展淡忘，港超入場人數繼續低迷，香港隊足球排名繼續低過中共。不過，有得關注總好過唔關注：至少筆者身邊嘅女仔識分鄭智同葉鴻輝，至少大家知道「hur」唔係屬於自己國家嘅國歌最多係罰款，而更重要嘅係，依家大家知道有咩能夠團結香港人。

袋住先，係架喇！但又如何？若你覺得單單靠兩場波就能令大家繼續關注香港足球，又或者確立香港本土文化，咁你就實在太天真喇；呢個情況，就好似以爲一屆世界盃就可以令全球人類鍾意踢波，又或者一場雨革就令全香港人覺醒。港中大戰，只係一個點，一個好細好細嘅點而已；不過有，總好過冇。

話雖如此，三分鐘熱度始終係唔好，但願香港足球真的能發展起來，不過真的很難……很難……

作者：小西毒（本文章由聚言時報授權提供）