好多時我地會話：假如我可以好似貓/狗/樹懶（下刪一堆動物）咁就好喇。不過事實上又係點？Buzzfeed最近就列出八種動物先會有，但換轉做人類去做就會出問題嘅行為，大家不妨研究下佢地講得啱唔啱？
1.好似貓咁訓足全日…
假如可以好似貓咁樣，日日齋訓係床乜都唔使做，仲畀錢我養埋家，包埋我一日三餐的話，聽落都咪話唔爽。
不過實際上，日日咁訓法除咗會血氣唔通引起多種毛病唔講，單係缺少運動引致肌肉萎縮呢下都夠你死。而且除非你係郭美美，否則邊有咁多機會可以「訓係度」都有錢收？
2.好似角蜥咁由眼噴血去嚇走敵人…
角蜥（Horned Lizard）天生有種防禦機制，就係可以由眼部噴血去嚇走敵人。不過對於人類又有無用？
理論上的確可行，始終你無端白事，隻眼好似水槍咁樣係咁噴血出來，正常人都見到都會買你怕。不過既然你得，即係人地都得喇係咪？以後大家唔使再出手打交，示威個陣人力唔使衝鐵馬、差佬唔使噴胡椒噴霧，大家企定定係度玩噴血，睇下邊個訓低先咪得囉。
3.好似雞泡魚咁一嬲就漲大…
雞泡魚一被人激嬲，就會將個身漲大，等對方以為雞泡魚大隻過佢好多，再加埋身上面啲刺去嚇走對方。
用係人類身上又可唔可行？筆者我就話一定得，因為以後大家就唔使轉彎抹角、甚至口都唔使開都可以話畀人知：我真係被你吹漲。
4.好似狗咁一生就生一竇…
養過狗都可能知道，啲狗一係唔生，一生就一大竇。當然做狗主果個就自然開心，但換轉係你老婆生一竇四、五個細路又點？
首先做阿媽果個一定痛到死都似，生一個已經慘過去死，重要佢去連續生五、六個，我估佢應該會去跳樓都唔生佢出來。
再講依家養個細路，大家都知要使好多錢，除非你打算打跛雙腳食綜援，否則一下子養咁多個，應該就到個老公要去跳海都似。
（未完待續）
