神話

半島嘉麟樓月餅（圖片來源：The Peninsula Hong Kong）

中秋節將至，本來想講吓半島嘉麟樓的月餅。正當我在思考為什麼我每年都要買嘉麟樓月餅的時候，我漸漸越想越遠，想到一個希臘神話。

希臘神話有個很悲哀的人物，名叫 Narcissus。佢靚仔，就係因為靚仔過頭，跌咗落水，死埋。話說，有日 Narcissus 喺條河到望到自己個倒影，但又唔知道個倒影係自己。佢覺得個倒影好靚，望咗幾日幾夜，徹底沉溺，之後因為望得太入神，跌咗落河，由沉溺變遇溺，死了。有說他死後變成一朵花，唯美得很。

身邊好多好朋友都懷疑我有病，而呢個病個名就係以呢位神話人物命名的：Narcissistic Personality Disorder，簡稱 NPD，中文名改得好 blunt，叫做「自戀型人格障礙」。你身邊總有一些「自我中心」或「自戀」的人，所以你絕對有必要搞唔清楚自我中心和自戀的分別。

自我中心的人基本上唔識同人溝通，而因為唔識亦都唔想同人溝通，佢哋嘅社交能力好弱。社交能力較弱的人，冇乜朋友，無論喺文華 Amber 嘅 private party，定係君悅 function room 舉行嘅 business luncheon，你都唔會見到呢啲人嘅出現。自我中心的人，surprisingly，原來通常沒有自信。

講完自我中心，講自戀，即是 NPD 患者。絕對無意抬高自戀的人，但葉朗程作為一個 NPD的疑似個案，可以話你聽，NPD 患者跟自我中心的人完全不同；NPD患者，即是自戀人，有很多優點。NPD 患者渴望自己做的事，或純粹自己的存在，能夠贏得別人認同。這些人極度外向、自信、對金錢和權力有瘋狂的追求。

利慾薰心，渴望認同，還算是優點？勉強算，因為渴望得到認同，所以 NPD 患者會做出很多「惠澤人群」的蠢事，例如買嘉麟樓月餅，仲要係買好多好多。未做葉朗程之前，一次過會買三十盒；做咗葉朗程之後，社交網絡多了一圈文化人和傳媒人，結果買了五十盒。買咁多，係買嚟派，既然唔係咁易買到 (至少普遍人認為唔係咁易買到)，那買得越多就代表越有面。要你讚我慷慨，要你多謝我的心意，要你覺得我好好好好勁，自戀的人很高調，因為低調冇人注意。蔡東豪說過，嘉麟樓月餅是典型的 Veblen goods，即是價錢越高，越多人想買，而買的人通常都「不是為自己增值，而是給其他人看」，屬於「炫耀性消費」。

炫耀性消費者有種特質，就是對批評和侮辱極度敏感。嘉麟樓月餅大幅加價九成那年，依然賣斷市，我很自豪，因為我依然要幾多盒有幾多盒。我好心問好朋友要唔要一盒，佢話佢都有好多。佢有好多唔緊要，但佢同我講佢識人，所以有折，二百幾蚊就有一盒。四百幾一盒嘉麟樓月餅，佢二百幾攞到，絕對唔係普通 discount，嗰刻我覺得自己被侮辱，但也非常好奇：真係二百幾蚊買到盒嘉麟樓？點知，原來他的嘉麟樓月餅是假的。

佢嗰盒係半島月餅，唔係嘉麟樓月餅。嘉麟樓是半島內的餐廳，但半島月餅是半島月餅，嘉麟樓月餅是嘉麟樓月餅，絕對不同。半島月餅係半島餅房做出嚟，價錢差不多平嘉麟樓一半；嘉麟樓月餅就是由嘉麟樓做出來，人手造，包裝更矜貴。當然，是不是真的人手製造，我不得而知；你問我味道有沒有分別，我如實告訴你，吃不出來，但我吃不出不代表沒有分別。提議《果籽》搵蔡瀾同唯靈等食家出嚟試吓，如果佢哋都試唔出分別，quite interesting。

當朋友知道佢嘅月餅同我嘅月餅原來級數上有咁大分別之後，我笑到佢無地自容。見到佢無地自容，我的興奮，從心而發，這就是「自戀人」病出面 (或賤出面) 的時候。由此可以想像，如果你是一個自戀人，你身邊的人會好痛苦。對，我身邊的人好痛苦。

Message 問她，我咁幼稚，你係唔係好痛苦？「不病發的時候，接受到。」咁病發呢？隔咗好耐，終於雙藍剔。「點呀，be yourself 啦。」Be myself，唔會乞人憎？又隔咗好耐，然後雙藍剔。「Perhaps it is your childish charm that makes stupid women like me want to mother you，呢個答案 ok？」幼稚的魅力，引發蠢女人的母性，呢個答案好深、好 British，係寸緊我定讚緊我？唔識分，不過好冧。

自戀人不壞，只要你肯溝通與關懷。