【3個鐘排隊買BAKE】可以用飲管啜嘅「芝士撻」

「芝士撻」瘋潮， BAKE 的威力我又一次低估了。(以為同星期三排「半熟工房」都係35分鐘就得， 結果今日我們花了6倍時間， 足足等了3個鐘)

BAKE舖位正正就是之前Beard Papa Sweets的位置， 近電梯底...今日人龍一直排過汽水櫃， 轉一個U字彎位， 兜過後面冷肉櫃， 龍尾差少少就返回 BAKE的舖位....認真誇張。

最愛八的我， 一定拉住工作人員問長問短啦...靚女阿Joe:「尋晚我哋8點要被方截龍， 賣到最後一個客人， 大約十點幾」

(聽講今日有人10點未開， 已經排隊喎)， 一邊補貨的Joe說:「係呀， 差唔多有80-100人...頭先我哋3點就暫時截龍， 睇吓夠唔夠賣先再開翻， 因為我哋要包保， 排到嘅客人一定買得到」

 (看似弱不禁風的阿Joe， 不時要200個一箱， 再一箱的補貨， BAKE的團隊精神真係唔錯喎)

原來「BAKE 芝士撻」是須要二重燒的關係， 所以日本空運抵港的， 全部未能即時進食....

店員要先塗蛋醬， 再焗10分鐘， 之後放涼20分鐘， 才可以入盒...阿Joe:「唔好以為飾櫃前面嗰D全部都可以賣， 只有頭兩盤先得咋」

網友說:「BAKE係無花邊嘅， 尖沙咀「半熟工房」係有花邊， 唔好攪錯」(其實一定唔會攪錯， 因為兩款芝士撻跟本不同)

半熟工房的似燉蛋， 而BAKE簡直 (誇張啲形容) 似心太軟， 一切即流心， (飲筒呀！ 攞飲筒嚟啜啦)

如果本港店員多塗點雞醬， 金黃的撻面便可以多一重焦感， 我問阿Joe喜愛吃那一款， 她很官腔答:「見人見智啦」 (計我話梗係焦啲好食啲啦)

BAKE芝士撻每個$20， 而且一直至9月4日， 也大酬賓買五送一， 即平均$16.7一個。

我曾經問過「半熟工房」， 你們售$22會否減價迎戰？ 對方答:「我哋係用成本計算出售價， 從來無諗過其他人點做， 所以暫時都唔會減價， 而且仲會好快開分店添」(夠型， 夠性格， 我鍾意！)

不過， 大家外賣一定要小心， 否則「浪吓浪吓」的芝士撻長途跋涉拿回家， 就會變成「全軍覆沒」的模樣啦！！

因為BAKE的芝士餡接近流質， 所以吃入口近乎不用嘴饞， 變相錯覺好像不太膩， 不太漏。 (阿囝今日輕而易舉KO了兩個撻...吖！一陣你就知咩叫飽到上心口...)

老實說， 兩間芝士撻肯定是BAKE的較易入口， 「半熟工房」的則有實在口感...不過， 如果將BAKE的芝士撻放入雪櫃， 一樣會變成半熟的效果。

可能SOGO地庫太空曠， 感覺「半熟工房」的芝士撻出爐時， 香味「篷篷聲攻埋嚟」。(感覺BAKE的味道鹹過半熟少少)

如果可以選擇， 個仁只愛酥皮撻， (BAKE應該幫不到我) ， 可能土炮 「半熟工房」將來有機會研究酥皮芝士撻， 到時我一定第一時間衝去試。

地址: 香港銅鑼灣軒尼詩道555號崇光百貨

營業時間:10:30-22:00